मुंबई ः आयपीएल स्पर्धेचा अंतिम सामना ३ जून रोजी अहमदाबाद येथील नरेंद्र मोदी स्टेडियमवर खेळवला जाणार आहे. बीसीसीआयच्या मंगळवारी झालेल्या प्रदीर्घ बैठकीत हा निर्णय घेण्यात आला आहे. तसेच पहिला क्वालिफायर सामना देखील नरेंद्र मोदी स्टेडियमवर होईल. हा सामना १ जून रोजी होणार आहे.
भारतीय क्रिकेट नियामक मंडळाने अंतिम सामन्यासह चार प्लेऑफ सामन्यांसाठी अहमदाबाद आणि मुल्लानपूरची नावे अंतिम केली आहेत. मुल्लानपूरमध्ये क्वालिफायर १ आणि एलिमिनेटर सामने होतील, तर अहमदाबादमध्ये क्वालिफायर २ आणि अंतिम सामना होईल. जुन्या वेळापत्रकानुसार, हैदराबाद आणि कोलकाता येथे प्लेऑफ सामने होणार होते. आतापर्यंत, पंजाब किंग्ज, गुजरात टायटन्स आणि रॉयल चॅलेंजर्स बंगळुरू या संघांनी प्लेऑफमध्ये आपले स्थान निश्चित केले आहे आणि मुंबई इंडियन्स आणि दिल्ली कॅपिटल्स यांच्यात चौथ्या स्थानासाठीची लढाई अजूनही सुरू आहे.
आरसीबी-हैदराबाद सामना लखनौमध्ये होणार
बीसीसीआय २३ मे रोजी आरसीबी आणि सनरायझर्स हैदराबाद यांच्यातील सामन्याचे ठिकाण देखील बदलू शकते. हैदराबाद आणि आरसीबी यांच्यातील सामना बंगळुरूमध्ये खेळवला जाणार आहे, परंतु आता तो लखनऊमध्ये होऊ शकतो. बंगळुरूमधील खराब हवामान पाहता हा निर्णय घेतला जाऊ शकतो. यापूर्वी, १७ मे रोजी होणारा आरसीबी आणि कोलकाता नाईट रायडर्स (केकेआर) यांच्यातील सामना पावसामुळे रद्द करण्यात आला होता आणि त्यात नाणेफेक होऊ शकली नाही.
सनरायझर्स संघ बंगळुरूला जाणार होता पण आरसीबी संघाविरुद्धच्या सामन्यासाठी त्यांना लखनौमध्येच थांबण्यास सांगण्यात आले आहे. भारतीय हवामान खात्याने गुरुवारपर्यंत बेंगळुरूमध्ये ऑरेंज अलर्ट जारी केला आहे आणि मुसळधार पावसाचा अंदाज वर्तवण्यात आला आहे. यामुळेच बोर्डाला शेवटच्या क्षणी या सामन्याचे ठिकाण बदलावे लागले आहे.
