इंग्लंड दौऱ्यासाठी भारतीय संघाची घोषणा, साई-अर्शदीप कसोटीत २ नवे चेहरे, करुण नायरचे पुनरागमन
मुंबई ः इंग्लंड दौऱ्यासाठी भारतीय संघाची घोषणा करण्यात आली आहे. शुभमन गिल याची कसोटी संघाचा नवा कर्णधार म्हणून निवड करण्यात आली आहे. ऋषभ पंत कसोटी संघाचा नवा उपकर्णधार आहे. गिल हा भारताचा ३७ वा कसोटी कर्णधार आहे.
याशिवाय, विदर्भ संघाचा भरवशाचा फलंदाज करुण नायर आठ वर्षांनी भारतीय संघात परतला आहे. अष्टपैलू शार्दुल ठाकूर यानेही भारतीय संघात पुनरागमन केले आहे. याशिवाय, भारतीय अ संघाचा कर्णधार अभिमन्यू ईश्वरनलाही संधी देण्यात आली आहे. कसोटी संघात साई सुदर्शन आणि अर्शदीप सिंग हे दोन नवे चेहरे आहेत. भारतीय संघात सहा मुख्य फलंदाज, दोन यष्टीरक्षक फलंदाज, दोन फिरकी गोलंदाज अष्टपैलू खेळाडू, दोन वेगवान गोलंदाज अष्टपैलू खेळाडू आणि पाच मुख्य जलद गोलंदाज आणि एक विशेषज्ञ फिरकी गोलंदाज आहे.
भारतीय संघाचा इंग्लंड दौरा
भारतीय संघ पाच सामन्यांच्या कसोटी मालिकेसाठी इंग्लंड दौऱ्यावर जाणार आहे. या मालिकेतील पहिली कसोटी २० जूनपासून लीड्समध्ये खेळवली जाईल. तर दुसरी कसोटी २ जुलैपासून बर्मिंगहॅममध्ये खेळवली जाईल. तिसरी कसोटी १० जुलैपासून लॉर्ड्सवर, तर चौथी कसोटी २३ जुलैपासून मँचेस्टरमध्ये खेळवली जाईल. पाचवी कसोटी ३१ जुलैपासून लंडनमधील ओव्हल येथे खेळवली जाईल. या मालिकेसह, भारताचे नवीन जागतिक कसोटी अजिंक्यपद चक्र (२०२५-२७) देखील सुरू होईल.
म्हणूनच बुमराहला कर्णधार बनवले नाही
रोहित शर्मा निवृत्त झाल्यापासून शुभमन गिल कर्णधार होणार याबद्दल चर्चा सुरू होती. तथापि, अनेक माजी क्रिकेटपटूंनीही जसप्रीत बुमराहला पाठिंबा दिला. भारतीय संघाची घोषणा करताना अजित आगरकर म्हणाले, ‘ऑस्ट्रेलिया दौऱ्यावर बुमराह प्रथम उपकर्णधार आणि नंतर कर्णधार होता, पण कर्णधारपद भूषवताना त्याच्यावर अतिरिक्त दबाव असतो. तो आमच्यासाठी खेळाडू म्हणून जास्त महत्त्वाचा आहे. त्याने तंदुरुस्त राहावे आणि विजयात योगदान द्यावे अशी आमची इच्छा आहे. कर्णधारपद भूषवताना, स्वतःच्या गोलंदाजीव्यतिरिक्त, तुम्हाला १५-१६ जणांचे व्यवस्थापन करावे लागते आणि आम्हाला त्याच्यावर दबाव आणायचा नव्हता. त्याच वेळी, केएल राहुलला कर्णधार न करण्याबाबत, आगरकर म्हणाले की तो यापूर्वीही कर्णधार होता आणि त्याचे नाव आमच्या रडारवर नव्हते. आम्हाला असा कर्णधार हवा होता जो येणाऱ्या काही काळासाठी भारतीय संघाचे नेतृत्व करू शकेल.
तीन खेळाडूंना वगळले
एवढेच नाही तर ऑस्ट्रेलिया दौऱ्यावर गेलेल्या भारतीय संघातून काही खेळाडूंना वगळण्यात आले आहे. यामध्ये सरफराज खान, देवदत्त पडिक्कल, हर्षित राणा यांचा समावेश आहे. ऑस्ट्रेलिया दौऱ्यात तिघांचाही समावेश होता. पडिक्कल सध्या दुखापतग्रस्त आहे आणि आयपीएल स्पर्धेतून देखील बाहेर आहे. त्याच्या जागी आरसीबीने मयंक अग्रवालचा समावेश केला आहे. सरफराज आणि हर्षित यांना इंग्लंड दौऱ्यावर जाणाऱ्या अ संघात स्थान देण्यात आले आहे, परंतु त्यांना मुख्य संघात स्थान मिळाले नाही. त्यांच्या जागी आलेल्या पाच नवीन खेळाडूंमध्ये साई सुदर्शन, करुण नायर, शार्दुल ठाकूर, अर्शदीप सिंग, कुलदीप यादव यांचा समावेश आहे. ऑस्ट्रेलिया दौऱ्यावर गेलेले रोहित शर्मा आणि विराट कोहली यांनी कसोटीतून निवृत्ती घेतली आहे. या परिस्थितीत, आणखी दोन खेळाडूंनी भारतीय कसोटीत स्थान मिळवले.
इंग्लंड दौऱ्यासाठी भारतीय संघ
शुभमन गिल (कर्णधार), ऋषभ पंत (यष्टीरक्षक/उपकर्णधार), यशस्वी जैस्वाल, केएल राहुल, साई सुदर्शन, अभिमन्यू ईश्वरन, करुण नायर, नितीश रेड्डी, रवींद्र जडेजा, ध्रुव जुरेल (यष्टीरक्षक), जसप्रीत बुमराह, मोहम्मद सिराज, वॉशिंग्टन सुंदर, शार्दुल ठाकूर, प्रसिद्ध कृष्णा, आकाश दीप, अर्शदीप सिंग आणि कुलदीप यादव.
