मुख्य प्रशिक्षक गॅरी स्टीडचा पद सोडण्याचा निर्णय
क्राइस्टचर्च ः न्यूझीलंड संघाला आगामी आंतरराष्ट्रीय क्रिकेट हंगाम सुरू होण्यापूर्वी मोठा धक्का बसला आहे. त्यामध्ये गेल्या ७ वर्षांपासून संघाच्या मुख्य प्रशिक्षकाची जबाबदारी सांभाळणारे गॅरी स्टीड यांनी आपले पद सोडण्याचा निर्णय घेतला आहे.
किवी संघाचे मुख्य प्रशिक्षक स्टीड यांचा करार जूनच्या अखेरीस संपत आहे आणि त्यांनी तो वाढवायचा नाही असा निर्णय घेतला आहे. मर्यादित षटकांच्या क्रिकेट प्रकारात ते मुख्य प्रशिक्षकपद सोडणार असल्याचे स्टेड यांनी आधीच सांगितले होते, परंतु किवी संघाचे नवीन धोरण आल्यानंतर, स्टीड यांनी आता करार संपल्यानंतर ही जबाबदारी सोडण्याचा निर्णय घेतला आहे.
किवी संघाची कामगिरी उत्कृष्ट
किवी संघाचे मुख्य प्रशिक्षक गॅरी स्टीड गेल्या ७ वर्षांपासून ही जबाबदारी सांभाळत आहेत, ज्यामध्ये त्यांच्या कार्यकाळात संघाने खूप चांगली कामगिरी केली आहे. स्टीड यांच्या कार्यकाळात २०२१ मध्ये किवी संघाने जागतिक कसोटी अजिंक्यपद विजेतेपद जिंकले होते, त्यानंतर त्यांच्या कार्यकाळात किवी संघाने २०२४ मध्ये भारत दौऱ्यावर खेळल्या गेलेल्या तीन सामन्यांच्या कसोटी मालिकेतही क्लीन स्वीप करण्यात यश मिळवले. मुख्य प्रशिक्षकपद सोडण्याच्या निर्णयासोबत स्टीड म्हणाले की, गेल्या सात वर्षांत मला अशा अनेक प्रतिभावान खेळाडूंसोबत काम करण्याची संधी मिळाली जे त्यांच्या देशासाठी, एकमेकांसाठी आणि चाहत्यांसाठी आपले सर्वोत्तम देण्यासाठी मैदानावर आले. या काळात आम्ही तिन्ही फॉरमॅटमध्ये खूप चांगली कामगिरी केली.
किवी बोर्डाला एकच मुख्य प्रशिक्षक हवान्यूझीलंड क्रिकेट बोर्डाने त्यांच्या नवीन धोरणात तिन्ही फॉरमॅटमध्ये एकच मुख्य प्रशिक्षक नियुक्त करण्याचा पर्याय निवडला आहे, त्यानंतर गॅरी स्टीड यांनी ही भूमिका सोडण्याचा निर्णय घेतला. गॅरी स्टीड हे सुरुवातीला कसोटी फॉरमॅटमध्ये आपली भूमिका सुरू ठेवू इच्छित होते, परंतु नंतर किवी बोर्डाचे नवीन धोरण पाहून त्यांनी असा निर्णय घेतला. न्यूझीलंड संघाला जुलै महिन्यात झिम्बाब्वे दौऱ्यावर पुढील मालिका खेळायची आहे, जी त्रिकोणीय टी २० मालिका असेल ज्यामध्ये तिसरा संघ दक्षिण आफ्रिकेचा असेल.
