मुंबई ः मुंबई इनडोअर क्रिकेट स्पोर्ट्स असोसिएशन आणि महा इनडोअर क्रिकेट असोसिएशनच्या मान्यतेने एमजीए फाउंडेशन एक भव्य इनडोअर क्रिकेट स्पर्धा आयोजित करत आहे. ही स्पर्धा रविवारी (२९ जून) गोरेगाव (पश्चिम), मुंबई येथील राम मंदिर रेल्वे स्टेशनजवळील सनटेक टर्फ येथे होणार आहे. हे सामने सकाळी ११ ते संध्याकाळी ७ वाजेपर्यंत दोन टर्फ पिचवर खेळवले जातील.
या स्पर्धेत एकूण ८ संघ सहभागी होतील. त्यांना प्रत्येकी ४ संघांच्या दोन गटात विभागले जाईल. प्रत्येक संघ त्यांच्या संबंधित गटात ३ राउंड-रॉबिन सामने खेळेल. प्रत्येक गटातील अव्वल दोन संघ उपांत्य फेरीसाठी पात्र ठरतील आणि उपांत्य फेरीतील विजेते विजेतेपद जिंकण्यासाठी अंतिम फेरीत सहभागी होतील.
या स्पर्धेच्या यशासाठी चॉइस इंटरनॅशनल लिमिटेड, कोटक बँक, होम स्क्वेअर प्रॉपर्टीज एलएलपी, वेल्थ अँड बियॉन्ड, चाणक्य एंटरप्रायझेस आणि महावीर मल्टी-स्पेशालिटी क्लिनिकसह अनेक नामांकित संस्थांनी त्यांचे प्रायोजकत्व आणि पाठिंबा दिला आहे, अशी माहिती एमजीए फाउंडेशनचे अधिकृत प्रतिनिधी मनीष अग्रवाल आणि स्नेहा पाटील यांनी दिली.
विजेत्या संघाला ट्रॉफी आणि २१,००० देण्यात येतील , तर उपविजेत्या संघाला ट्रॉफी आणि ११,००० रुपये देण्यात येतील. उर्वरित सर्व सहभागी संघांना एमजीए फाउंडेशनकडून प्रत्येकी ५,००० रुपये किमतीचे व्हाउचर देऊन गौरविण्यात येईल.
स्पर्धेत सहभागी होणारे संघ
टीडीएस किंग्ज, टॅक्स टायटन्स, आयटीआर वॉरियर्स, रिटर्न मेकर्स, ऑडिट आर्मी, मनी मास्टर्स, जीएसटी ग्लॅडिएटर्स आणि ईगल लेजर्स.
