कोलंबो ः चरित असलंकाच्या धमाकेदार कामगिरीच्या बळावर श्रीलंका संघाने पहिल्या एकदिवसीय सामन्यात बांगलादेश संघाचा ७७ धावांनी पराभव केला. असलंका याने सचिन तेंडुलकर, विराट कोहली आणि सनथ जयसूर्याच्या पातळीवर पोहोचून शतक ठोकून असा चमत्कार केला आहे.
या सामन्यात श्रीलंकेचा कर्णधार चरित असलंकाने नाणेफेक जिंकून प्रथम फलंदाजी करण्याचा निर्णय घेतला. श्रीलंकेच्या संघाने प्रथम फलंदाजी करताना एकूण २४४ धावा केल्या. असलंकाने संघासाठी चांगली फलंदाजी केली आणि त्याच्यामुळेच संघ सन्मानजनक धावसंख्या गाठू शकला.
चरित असलंकाने श्रीलंकेचा डाव सावरला
श्रीलंकेच्या संघाची सामन्यात सुरुवात खूपच खराब झाली, जेव्हा पथुम निस्सांका (शून्य धावा) आणि निस्सांका मधुशंका (६ धावा) मोठी धावसंख्या उभारू शकले नाहीत. त्यानंतर कामिंदू मेंडिस आपले खातेही उघडू शकले नाहीत. तीन विकेट गमावल्यानंतर श्रीलंकेचा संघ अडचणीत सापडला. त्यानंतर कुशल मेंडिस आणि चरित असलंका यांनी धावा काढण्याची जबाबदारी घेतली. असलंकाने सामन्यात १२३ चेंडूत १०६ धावा केल्या, ज्यामध्ये ६ चौकार आणि चार षटकारांचा समावेश होता. दुसरीकडे, कुसलने ४५ धावा केल्या.
प्रेमदासा क्रिकेट स्टेडियमवर चौथे शतक
आता चरित असलंकाने कोलंबोच्या आर प्रेमदासा स्टेडियमवर एकदिवसीय क्रिकेटमधील त्याचे चौथे शतक केले आहे. यासह, त्याने सचिन तेंडुलकर, विराट कोहली आणि सनथ जयसूर्याची बरोबरी केली आहे. या खेळाडूंनी कोलंबोच्या आर प्रेमदासा क्रिकेट स्टेडियमवर प्रत्येकी चार एकदिवसीय शतके देखील केली आहेत. अस्लंकाने कोलंबोच्या आर प्रेमदासा क्रिकेट स्टेडियमवर एकूण २२ सामने खेळले आहेत आणि १००२ धावा केल्या आहेत. या दरम्यान, त्याच्या बॅटमधून चार शतके आणि चार अर्धशतके निघाली आहेत.
एकदिवसीय क्रिकेटमध्ये २००० हून अधिक धावा
२८ वर्षीय चरित असांकाने २०२१ मध्ये श्रीलंकेसाठी एकदिवसीय पदार्पण केले. तेव्हापासून, त्याने श्रीलंकेच्या संघासाठी ७४ एकदिवसीय सामन्यांमध्ये एकूण २४८० धावा केल्या आहेत. त्याने पाच शतके आणि १५ अर्धशतके केली आहेत.
तस्किन अहमदने चार विकेट घेतल्या
बांगलादेशविरुद्धच्या सामन्यात चरित अस्लंकाने १०६ धावा आणि कुसल मेंडिसने ४५ धावा केल्या. या दोन खेळाडूंव्यतिरिक्त, पदार्पण करणाऱ्या मिलन रथनायकेने २९ धावांचे योगदान दिले. बांगलादेशकडून तस्किन अहमदने सर्वाधिक चार विकेट घेतल्या. तंजीम हसन शाकिब याने तीन विकेट घेतल्या. तन्वीर इस्लाम आणि नझमुल हसन शांतो यांनी प्रत्येकी एक विकेट घेतली.
बांगलादेश संघ २४४ धावसंख्येचा पाठलाग करण्यासाठी मैदानात उतरला. मात्र, बांगलादेश संघाचा डाव ३५.५ षटकात १६७ धावांत गडगडला. श्रीलंका संघाने ७७ धावांनी विजय साकारला. चरित असलंका सामनावीर पुरस्काराचा मानकरी ठरला.
