मिताली राजनंतर अशी कामगिरी करणारी स्मृती ही दुसरी भारतीय खेळाडू
लंडन ः भारतीय महिला क्रिकेट संघाची स्टार खेळाडू स्मृती मानधनाने २०२५ मध्ये आतापर्यंत फलंदाजीने उत्कृष्ट कामगिरी केली आहे. इंग्लंड दौऱ्यावर झालेल्या टी-२० मालिकेत मानधनाने आपला फॉर्म कायम ठेवला आहे. या मालिकेतील पहिल्या सामन्यात तिच्या बॅटमधून एक शानदार शतक झळकावण्यात आले होते, तर तिसऱ्या सामन्यात ती अर्धशतकी खेळी करण्यात यशस्वी झाली. या खेळीच्या जोरावर स्मृती मानधनाने आंतरराष्ट्रीय क्रिकेटमधील एका खास क्लबचा भाग बनली आहे, ज्यामध्ये यापूर्वी फक्त टीम इंडियाची माजी कर्णधार मिताली राज होती.
स्मृती मानधनाने इंग्लंड महिला संघाविरुद्धच्या टी-२० मालिकेतील तिसऱ्या सामन्यात तिन्ही फॉरमॅट एकत्रित करून ५६ धावांची खेळी खेळून आंतरराष्ट्रीय क्रिकेटमध्ये ९००० धावा पूर्ण केल्या. मानधन ही महिला आंतरराष्ट्रीय क्रिकेटमध्ये हा आकडा गाठणारी पाचवी आणि दुसरी भारतीय खेळाडू आहे. मिताली राजचे नाव या यादीत वरच्या स्थानावर आहे, जिने तिन्ही फॉरमॅटमध्ये एकूण १०८६८ धावा केल्या आहेत. मानधनाने आतापर्यंत तिन्ही प्रकारात एकूण ९०४४ धावा केल्या आहेत. कसोटीत तिच्या ९८७ धावा आहेत, तर एकदिवसीय सामन्यात तिने ४४७३ धावा आणि टी-२० आंतरराष्ट्रीय सामन्यात ३९४२ धावा केल्या आहेत.
महिला आंतरराष्ट्रीय क्रिकेटमध्ये सर्वाधिक धावा करणाऱ्या खेळाडूंमध्ये स्मृती मानधना आता पाचव्या स्थानावर पोहोचली आहे. पहिल्या स्थानावर मिताली राज आहे. मितालीने १०८६८ धावा काढल्या आहेत. त्यापाठोपाठ सुझी बेट्स (न्यूझीलंड) – १०६१२ धावा, शार्लोट एडवर्ड्स (इंग्लंड) – १०२७३ धावा, स्टेफनी टेलर (वेस्ट इंडिज) – ९२९९ धावा या खेळाडू आहेत. स्मृती मानधना ९०४४ धावांसह पाचव्या स्थानावर आहे.
इंग्लंड महिला संघाविरुद्धच्या तिसऱ्या टी-२० सामन्यात स्मृती मानधनाच्या अर्धशतकी खेळीने भारतीय संघाला विजय मिळवून दिला नाही. या सामन्यात भारतीय संघाला १७२ धावांचे लक्ष्य मिळाले होते, ज्यामध्ये मानधनाने महत्त्वाच्या वेळी ५६ धावांच्या वैयक्तिक धावसंख्येवर आपली विकेट गमावली. तिसऱ्या टी २० सामन्यात भारतीय संघाला ५ धावांनी पराभव स्वीकारावा लागला.
