२ ऑगस्टपासून रंगणार, विजेत्याला मिळणार ३ लाख रुपयांचे रोख पारितोषिक
सोलापूर ः महाराष्ट्र शुगर क्रिकेट लीग २०२५ ही राज्यातील पहिली टेनिस बॉल फुलपीच क्रिकेट स्पर्धा असणार आहे. या स्पर्धेला दोन ऑगस्टपासून सुरू होणार असल्याची माहिती सीताराम महाराज साखर कारखान्याचे कार्यकारी संचालक सुयोग गायकवाड यांनी दिली.
हॉटेल सूर्या एक्झिक्युटिव्ह येथे झालेल्या या पत्रकार परिषदेमध्ये स्पर्धेच्या लोगोचे अनावरण करण्यात आले. तसेच स्पर्धेतील सहभागी संघांची यादी, नियमावली व इतर महत्त्वाची माहिती सादर करण्यात आली. यावेळी बोलताना सुयोग गायकवाड म्हणाले की, “या अनोख्या क्रिकेट लीगला सोलापूर जिल्ह्यातील २० साखर कारखान्यांचा प्रतिसाद लाभला आहे. संचालक, अधिकारीवर्ग, कामगार यांचा उत्स्फूर्त सहभाग या लीगमधून एकात्मता व बंधुभावाचे दर्शन घडवत आहे. ही स्पर्धा केवळ खेळापुरती मर्यादित न राहता, सोलापूर जिल्ह्याच्या सामाजिक आणि औद्योगिक विकासासाठी एक सकारात्मक पाऊल ठरेल.”
या पत्रकार परिषदेला भैरवनाथ शुगरचे कार्यकारी संचालक ऋतुराज सावंत, विविध साखर कारखान्यांचे संचालक, व्यवस्थापकीय संचालक, महाव्यवस्थापक, अधिकारीवर्ग आणि सर्व २० सहभागी संघांचे कर्णधार उपस्थित होते.
स्पर्धेचा तपशील असा
- उद्घाटन समारंभ : २ ऑगस्ट – हरिभाई देवकरण प्रशाला मैदान
- स्पर्धेचे सामने : ३ ते १० ऑगस्ट – दयानंद कॉलेज मैदान
- स्पर्धा स्वरूप : बाद पद्धत
- थेट प्रसारण : विविध सोशल मीडिया प्लॅटफॉर्मवर
पारितोषिके
- प्रथम – ३ लाख
- द्वितीय – २ लाख
- तृतीय – १ लाख
- मॅन ऑफ द सिरीज – इलेक्ट्रिक स्कूटर
- सर्वोत्तम गोलंदाज व फलंदाज – प्रत्येकी ₹५१ हजार
- प्रत्येक सामनावीर – भेट वस्तू
