रवींद्र जडेजाची एकाकी झुंज, भारतीय संघाचा अवघ्या २२ धावांनी पराभव
लंडन : लॉर्ड्स कसोटी सामन्यात इंग्लंड संघाने २२ धावांनी रोमांचक विजय मिळवला. अष्टपैलू रवींद्र जडेजाची नाबाद ६१ धावांची लढाऊ खेळी व्यर्थ गेली. या विजयासह इंग्लंडने अँडरसन-तेंडुलकर ट्रॉफी मालिकेत २-१ अशी आघाडी घेतली आहे. चौथा कसोटी सामना येत्या २३ जुलैपासून मँचेस्टर येथे सुरू होणार आहे.
भारत आणि इंग्लंड यांच्यातील पाच सामन्यांच्या कसोटी मालिकेतील तिसरा सामना लॉर्ड्स येथे खेळला गेला आणि हा कसोटी सामना इंग्लिश संघाने २२ धावांनी जिंकला. या सामन्यात इंग्लंडने टीम इंडियासमोर विजयासाठी १९३ धावांचे लक्ष्य ठेवले होते. परंतु प्रत्युत्तरात १७० धावा करून भारतीय संघ सर्वबाद झाला. दुसऱ्या डावात टीम इंडियाचा एकही फलंदाज क्रीजवर फलंदाजी करू शकला नाही, ज्यामुळे त्यांना शेवटी पराभवाचा सामना करावा लागला.
पहिल्या डावात दोन्ही संघांनी ३८७ धावा केल्या होत्या. या सामन्यात इंग्लंडने नाणेफेक जिंकून प्रथम फलंदाजी करण्याचा निर्णय घेतला. प्रथम फलंदाजी करताना इंग्लंडला ३८७ धावा करता आल्या. पहिल्या डावात इंग्लंडकडून जो रूटने सर्वाधिक १०४ धावा केल्या. त्याच्याशिवाय जेमी स्मिथने ५१ आणि ब्रायडन कार्सने ५६ धावांचे योगदान दिले. प्रत्युत्तरात टीम इंडिया पहिल्या डावात ३८७ धावा करण्यात यशस्वी झाली. भारताकडून केएल राहुलने पहिल्या डावात शतक झळकावले, त्याच्याशिवाय ऋषभ पंतने ७४ आणि रवींद्र जडेजाने ७२ धावा केल्या.
दुसऱ्या डावात इंग्लंडचा संघ फलंदाजीसाठी आला तेव्हा त्यांचे फलंदाज तिथेही विशेष काही करू शकले नाहीत. दुसऱ्या डावात इंग्लिश संघाने सतत विकेट गमावल्या. तिथेही जो रूटने संघासाठी सर्वाधिक ४० धावा केल्या. त्याच्याशिवाय कर्णधार बेन स्टोक्सने ३३ आणि हॅरी ब्रूकने २३ धावा केल्या. दुसऱ्या डावात वॉशिंग्टन सुंदरने भारताकडून सर्वाधिक ४ बळी घेतले. त्याच वेळी जसप्रीत बुमराह आणि मोहम्मद सिराज यांनी प्रत्येकी दोन बळी घेतले. दुसऱ्या डावात इंग्लंडचा संघ १९२ धावा करण्यात यशस्वी झाला.
भारतीय फलंदाज निराश झाले
या कसोटी मालिकेत टीम इंडियाच्या फलंदाजांची कामगिरी पाहता, सर्वांनाच अशी अपेक्षा होती की भारत १९३ धावांचे लक्ष्य अगदी सहजपणे गाठेल. पण कसोटी सामन्यात चौथ्या डावाचा दबाव वेगळ्या पातळीवर असतो आणि भारताच्या फलंदाजीदरम्यान असेच काहीसे दिसून आले. चौथ्या डावात भारतीय फलंदाज दबावाखाली तुटू लागले. यशस्वी जयस्वाल असो वा शुभमन गिल असो वा करुण नायर, कोणीही क्रीजला चिकटून फलंदाजी करण्याचा प्रयत्न केला नाही.
वरच्या फळीत केएल राहुल आणि खालच्या फळीत रवींद्र जडेजा यांनी काही प्रमाणात संघाला विजय मिळवून देण्याचा प्रयत्न केला, परंतु त्यांना इतर कोणत्याही फलंदाजाकडून पाठिंबा मिळाला नाही. शेवटी, संपूर्ण भारतीय संघ १७० धावांवर आटोपला. इंग्लंडकडून आर्चरने दुसऱ्या डावात सर्वाधिक ४ विकेट्स घेतल्या. त्याच्याशिवाय बेन स्टोक्स आणि ब्रायडन कार्स यांनी प्रत्येकी दोन विकेट्स घेतल्या. या डावात जडेजा हा भारताच्या फलंदाजीत एकमेव हिरो होता, तो १८१ चेंडूत ६१ धावा करून नाबाद परतला. रवींद्र जडेजा याने या डावात अप्रतिम फलंदाजी केली. शेवटपर्यंत जडेजाने किल्ला लढवला. बशीरने सिराजला क्लीन बोल्ड केले आणि भारतीय क्रिकेट चाहत्यांचे स्वप्न केवळ २२ धावांनी भंगले.
इंग्लंडच्या जोफ्रा आर्चर याने ५५ धावांत तीन विकेट घेतल्या. आर्चरने पंत (९) व सुंदर (०) यांना बाद करुन संघाच्या विजयाचा मार्ग सुकर बनवला होता. परंतु, जडेजाने चिवट फलंदाजी करत इंग्लंडला कडवी झुंज दिली. बेन स्टोक्स याने ४८ धावांत तीन महत्वाचे बळी टिपले.
कपिलच्या नेतृत्वात विजय
लॉर्ड्स कसोटीच्या पाचव्या दिवसापर्यंत ‘स्विंग’चा प्रभाव कमी होतो, परंतु सीम हालचालीमुळे चेंडू उसळी घेतल्यानंतर त्याची दिशा बदलू लागतो. केएल राहुल देखील अशाच एका चेंडूचा बळी ठरला, ज्याला बेन स्टोक्सने बाद केले. खेळपट्टीच्या स्वरूपात झालेल्या बदलामुळे मालिकेतील तिसऱ्या कसोटीत भारतीय संघाला संघर्ष करावा लागला. लॉर्ड्स मैदानावर भारतीय संघाने आतापर्यंत यशस्वीरित्या पाठलाग केलेला सर्वाधिक धावसंख्या १३६ धावांचा आहे, जो भारतीय संघाने १९८६ मध्ये कपिल देव यांच्या नेतृत्वाखाली गाठला होता.
