बुमराह चौथ्या कसोटीत खेळू शकतो

सराव सत्रात अर्शदीप जखमी, पंत तंदुरुस्त होण्याची अपेक्षा 

मँचेस्टर ः लॉर्ड्स कसोटीतील पराभवानंतर पुन्हा एकदा वेगवान गोलंदाज जसप्रीत बुमराह चौथ्या कसोटी सामन्यात खेळेल की त्याला विश्रांती दिली जाईल या चर्चांना वेग आला आहे. परंतु यावेळी भारतीय संघ व्यवस्थापन कोणत्याही प्रकारचा धोका पत्करण्याच्या मनःस्थितीत नाही. मालिकेत १-२ ने पिछाडीवर राहिल्यानंतर, संघ व्यवस्थापनाने २३ जुलैपासून ओल्ड ट्रॅफर्ड येथे सुरू होणाऱ्या ‘करो या मर’ चौथ्या कसोटीत बुमराहला मैदानात उतरवण्याची तयारी केली आहे.

बुमराह चौथ्या कसोटीत खेळू शकतो
लीड्स कसोटी गमावल्यानंतर बुमराहला एजबॅस्टन कसोटीत विश्रांती देण्यात आली होती, परंतु मँचेस्टरमध्ये या वेगवान गोलंदाजाला विश्रांती देणे भारतीय संघासाठी धोक्याची घंटा ठरू शकते. जर भारत येथे हरला तर मालिका गमावली जाईल. अशा परिस्थितीत, पाचव्या कसोटीत त्याला मैदानात उतरवण्यात काही अर्थ राहणार नाही. गोलंदाजीच्या वर्कलोड व्यवस्थापनामुळे, पाच कसोटींच्या मालिकेतील तीन कसोटींमध्ये बुमराहला मैदानात उतरवण्याचा निर्णय घेण्यात आला. बुमराहने दोन कसोटी सामने खेळले आहेत आणि त्याला उर्वरित दोन कसोटींपैकी फक्त एकच सामना खेळायचा आहे. भारतीय संघाचे सहाय्यक प्रशिक्षक रायन टेन डोइशेट म्हणाले की, मँचेस्टरमध्ये मालिका निर्णायक स्थितीत आहे हे स्पष्ट आहे, त्यामुळे आमचा कल बुमराहला येथे खेळवण्याचा आहे. तथापि, त्याला खेळवण्याचा निर्णय शेवटच्या क्षणी घेतला जाईल.

भारतीय संघाच्या सराव सत्रानंतर, टेन डोइशेट म्हणाले, आम्हाला माहित आहे की आम्हाला उर्वरित दोन कसोटी सामन्यांपैकी फक्त एका सामन्यात त्याला खेळवण्याची संधी आहे, परंतु आम्हाला इतर अनेक पैलूंकडे देखील लक्ष द्यावे लागेल. भारतीय संघ १९ जुलै रोजी मँचेस्टरला पोहोचेल, तोपर्यंत संघ येथे सराव करेल. तथापि, इंग्लंडचा कर्णधार स्टोक्सने वर्कलोड व्यवस्थापनाकडे दुर्लक्ष केले आणि लॉर्ड्सवर भारतावर २२ धावांनी विजय मिळवून दिला. स्टोक्सने ९.२ आणि १० षटके असे सलग दोन स्पेल टाकले. प्रशिक्षक मॅक्युलम त्याला मैदानावर संदेश पाठवत होते की त्याने त्याच्या शरीराची काळजी घ्यावी, परंतु स्टोक्स संघासाठी थांबले नाहीत. या विषयावर दोन्ही क्रिकेटपटूंची तुलना करण्यास टेन डोइशेटने नकार दिला.

अर्शदीपला सराव सत्रात दुखापत 
अर्शदीप सिंग याला सराव सत्र दरम्यान दुखापत झाली. गोलंदाजी करताना साई सुदर्शनचा शॉट थांबवण्याचा प्रयत्न करताना त्याच्या हाताला दुखापत झाली. टेन डोइशेट म्हणाले की, साईचा शॉट थांबवण्याचा प्रयत्न करताना त्याच्या हातावर जखम झाली आहे. हा कट किती धोकादायक आहे हे आपल्याला पाहावे लागेल. त्याला डॉक्टरकडे नेण्यात आले आहे. पुढील नियोजनासाठी महत्त्वाची गोष्ट म्हणजे त्याला टाके लागतील की नाही. अर्शदीप याने गोलंदाजीतून माघार घेतल्यानंतर, गोलंदाजी प्रशिक्षक मार्ने मॉर्केल याला गोलंदाजी करावी लागली.

पंत पूर्णपणे तंदुरुस्त होण्याची अपेक्षा
लॉर्ड्सवर दुखापत झालेल्या ऋषभ पंतने गुरुवारी झालेल्या सराव सत्रात फलंदाजी केली नाही. परंतु तो संघासोबत उपस्थित होता. टेन डोइशेट म्हणाले, पंतने तिसऱ्या कसोटीत वेदना होत फलंदाजी केली. तो बरा होत आहे आणि आम्हाला पुन्हा एकदा अशा परिस्थितीत जायचे नाही जिथे त्याच्या बोटाला समस्या आहे. आणि आम्हाला अतिरिक्त कीपर बोलावावे लागेल. म्हणूनच त्याला सराव सत्रातून विश्रांती देण्यात आली आहे. आशा आहे की तो चौथ्या कसोटीपूर्वी बरा होईल.