२५ हजार डॉलरचे पारितोषिक जाहीर
नवी दिल्ली ः यांगूनमधील थुवुन्ना स्टेडियमवर झालेल्या महिला आशियाई कप २०२६ क्वालिफायर्स ग्रुप डी च्या तिसऱ्या आणि शेवटच्या सामन्यात भारतीय महिला २० वर्षांखालील फुटबॉल संघाने म्यानमार संघाला १-० असे पराभूत करण्यात यश मिळवले. या विजयासह, भारतीय महिला फुटबॉल संघाने जवळजवळ २ दशकांत प्रथमच एएफसी २० वर्षांखालील महिला आशियाई कप फुटबॉल स्पर्धेसाठी पात्रता मिळवली आहे. भारतीय महिला २० वर्षांखालील संघाने पात्रता फेरीत उत्तम कामगिरी दाखवली आहे, ज्यामध्ये गेल्या सामन्यातील विजयासह ७ गुणांसह ग्रुप-डी मध्ये पहिल्या स्थानावर पोहोचला आहे.
म्यानमारविरुद्धच्या सामन्यात भारतीय महिला २० वर्षांखालील संघाला विजय मिळवून देण्यात पूजाच्या एकमेव गोलने महत्त्वाची भूमिका बजावली. पूजाचा हा गोल सामन्याच्या ७ व्या मिनिटाला झाला. पहिल्या सत्रात भारतीय संघाने आपले वर्चस्व कायम ठेवले. यानंतर, म्यानमार संघाने दुसऱ्या हाफमध्ये पुनरागमन करण्याचा प्रयत्न केला परंतु त्यांना गोल करण्यात यश आले नाही. भारतीय महिला फुटबॉल अंडर-२० संघाने यापूर्वी २००६ मध्ये एएफसी अंडर-२० महिला आशियाई कप फुटबॉल स्पर्धेसाठी पात्रता मिळवली होती.
ही स्पर्धा २०२६ मध्ये थायलंडमध्ये खेळवली जाईल
एएफसी अंडर-२० महिला आशियाई कप फुटबॉल स्पर्धा २०२६ मध्ये थायलंडच्या यजमानपदाखाली खेळवली जाईल. यापूर्वी, भारतीय वरिष्ठ महिला फुटबॉल संघाने जुलै महिन्यात एएफसी महिला आशियाई कप २०२६ साठी आपले स्थान निश्चित केले होते. भारतीय महिला अंडर-२० फुटबॉल संघाने पात्रता फेरीत इंडोनेशिया संघाशी गोलरहित बरोबरी साधली होती, परंतु त्यांनी तुर्कमेनिस्तानचा ७-० असा एकतर्फी पराभव केला. भारताच्या गटात असलेल्या म्यानमारचे सध्या एकूण चार गुण आहेत आणि त्यांनी अद्याप तुर्कमेनिस्तानविरुद्ध एकही सामना खेळलेला नाही आणि त्यात विजय मिळवला तरी त्यांचे जास्तीत जास्त ५ गुण असू शकतात.
२५ हजार डॉलरचे बक्षीस जाहीर
अखिल भारतीय फुटबॉल महासंघाने २००६ नंतर पहिल्यांदाच एएफसी अंडर २० महिला आशियाई कपसाठी महिला संघाला पात्र ठरविले. अंडर २० महिला संघाने सात गुणांसह गट ड गटात अव्वल स्थान पटकावले आणि रविवारी यांगूनमध्ये यजमान म्यानमारवर १-० असा विजय मिळवून आपल्या मोहिमेचा शेवट केला. एआयएफएफच्या प्रसिद्धीपत्रकात म्हटले आहे की, अस्मिता महिला फुटबॉल लीगसारख्या उपक्रमांमुळे तळागाळातील रचना मजबूत झाली आहे ज्यामुळे गेल्या वर्षी नोंदणीकृत महिला फुटबॉलपटूंच्या संख्येत ‘२३२ टक्के वाढ’ झाली आहे.
