मुंबई : दादर (पूर्व) येथील शिवनेरी सेवा मंडळाच्या विद्यमाने १५ ऑगस्ट रोजी आयोजित करण्यात आलेल्या शिवनेरी रोड रेसमध्ये ५०० पेक्षा जास्त धावपटूंचा सहभाग लाभला आहे.
१०, १२, १४, १६ वर्षांखालील मुला-मुलींच्या विविध वयोगटात ही रोड रेस रंगणार आहे. मुंबई शहर आणि मुंबई उपनगर जिल्ह्यातील धावपटूंना या रेसमध्ये प्रवेश देण्यात आला आहे. सर्वात जास्त धावपटू १४ वर्षांखालील गटात सहभागी झाले आहेत. या रेसमध्ये भाग घेतलेल्या काही धावपटूंनी मुंबई जिल्ह्याचे प्रतिनिधित्व राज्य क्रॉस कंट्री स्पर्धेत केले आहे.
मुंबई शहर व उपनगरातील अनेक नामवंत अॅथलेटिक संघाचे धावपटू या रेसमध्ये भाग घेत आहेत. मुंबई शहर जिल्हा हौशी अॅथलेटिक्स असोसिएशनच्या मान्यतेने ही रेस होत असून त्या संघटनेचे पंच शर्यतीवर देखरेख ठेवतील. शर्यतीला सकाळी ६ वाजता शिंदेवाडी भवानीमाता मैदान, दादर (पूर्व) येथून सुरुवात होईल. रेस मध्ये विविध वयोगटासाठी आकर्षक पारितोषिके ठेवण्यात आली आहेत. अधिक माहितीसाठी मोबाईल क्रमांक ९७६९५९१४१३ अथवा ९८२१३९४७१२ यावर संपर्क साधावा.
