शुभमन गिलची उपकर्णधारपदी निवड, यशस्वी जैस्वालला वगळले
मुंबई ः आगामी आशिया कप क्रिकेट स्पर्धेसाठी भारतीय क्रिकेट संघाची घोषणा करण्यात आली आहे. संघाचे कर्णधारपद सूर्यकुमार यादव करणार हे आधीच निश्चित होते. कसोटी संघाचा कर्णधार शुभमन गिल याला संघाचे उपकर्णधार बनवण्यात आले आहे.
दरम्यान, भारतीय संघाच्या घोषणेमुळे एका खेळाडूला प्रचंड फायदा होत असल्याचे दिसून येत आहे. काही दिवसांपूर्वीपर्यंत तो खेळाडू संघाचा भागही नव्हता, परंतु अचानक नशीब बदलले. त्यानंतर गोष्टी बदलत राहिल्या. आपण शुभमन गिलबद्दल बोलत आहोत, जो कसोटीत टीम इंडियाचा कर्णधार आहे आणि आता त्याची आशिया कपसाठीही निवड झाली आहे.
यावेळी भारतीय संघ आक्रमक फलंदाज सूर्यकुमार यादवच्या नेतृत्वाखाली आशिया कप स्पर्धेसाठी मैदानात उतरेल. भारतीय संघात उपकर्णधारपदाची जबाबदारी शुभमन गिलकडे सोपवण्यात आली आहे. यापूर्वी, शुभमन दोन मालिकांमध्ये भारतीय संघाचा भाग नव्हता, परंतु तो अचानक भारतीय संघात आलाच नाही तर उपकर्णधार देखील झाला. आधी ही जबाबदारी अक्षर पटेल पार पाडत होता, जो यावेळी संघात आहे, पण आता तो खेळाडू म्हणून खेळताना दिसेल. गेल्या काही महिन्यांत शुभमन गिलचे अच्छे दिन अचानक आले आहेत. तो कसोटी संघाचा कर्णधार झाला आहे आणि टी २० मध्ये उपकर्णधाराची जबाबदारीही तो पाहणार आहे.
मध्यंतरी असे वृत्त होते की शुभमन गिल आशिया कप संघाचा भाग राहणार नाही. अभिषेक शर्मा आणि संजू सॅमसन सलामीवीर म्हणून दिसतील, तर यशस्वी जैस्वाल तिसऱ्या सलामीवीराची भूमिका बजावणार आहेत. पण जेव्हा संघाची घोषणा करण्यात आली तेव्हा यशस्वीचे नाव त्यात नव्हते. आता शुभमन गिल संघाचा उपकर्णधार असल्याने तो अंतिम अकरा संघाचा भाग असेल हे देखील निश्चित आहे. पण तो कोणत्या क्रमांकावर फलंदाजीला येईल, हे खूप महत्वाचे ठरणार आहे.
आशिया चषकासाठी भारतीय संघ
सूर्यकुमार यादव (कर्णधार), शुभमन गिल (उपकर्णधार), अभिषेक शर्मा, तिलक वर्मा, हार्दिक पांड्या, शिवम दुबे, अक्षर पटेल, जितेश शर्मा (यष्टीरक्षक), जसप्रीत बुमराह, अर्शदीप सिंग, वरुण चक्रवर्ती, कुलदीप यादव, संजू सॅमसन, हर्षित राणा आणि रिंकू सिंग.
