नाशिक ः आंतरराष्ट्रीय खेळाडू साईराज परदेशी याची सलग सहव्या वेळेस भारतीय संघात निवड करण्यात आली असून अहमदाबाद येथे २४ ते ३० ऑगस्ट दरम्यान होणाऱ्या कॉमनवेल्थ चैम्पियनशिप या आंतरराष्ट्रीय स्पर्धेसाठी ८८ किलो वजनी गटात साईराज राजेश परदेशी हा भारतीय संघाचे प्रतिनिधित्व करणार आहे. तसेच
महाराष्ट्रातील एकमेव आंतरराष्ट्रीय प्रशिक्षक तृप्ती शेखर पाराशर हिची भारतीय संघाच्या प्रशिक्षकपदी नियुक्ती करण्यात आली असून तृप्तीची ही सलग नववी आंतरराष्ट्रीय स्पर्धा आहे.
नाशिक जिल्ह्यातील मनमाड सारख्या छोट्या शहरातील खेळाडू व प्रशिक्षक आंतरराष्ट्रीय स्तरावर भारतीय संघाचे प्रतिनिधित्व करत आहेत आणि ही समस्त मनमाड करांसाठी अभिमानाची बाब आहे. भारताचे पंतप्रधान नरेंद्र मोदी यांनी आपल्या मन की बात या कार्यक्रमात साईराजचा गौरव केला होता. साईराज पुन्हा एकदा आपल्या उत्कृष्ट कामगिरीच्या जोरावर आंतरराष्ट्रीय स्तरावर भारतासाठी पदक मिळवून देण्यासाठी सज्ज झाला आहे.
साईराज परदेशीला वेटलिफ्टिंग प्रशिक्षक प्रवीण व्यवहारे, आंतरराष्ट्रीय प्रशिक्षक तृप्ती पाराशर, भारतीय क्रीडा प्राधिकरणाचे आलोकेश बरवा, डी डी शर्मा यांचे मार्गदर्शन लाभले आहे. महाराष्ट्र वेटलिफ्टिंग संघटनेचे सचिव संतोष सिंहासने, अध्यक्ष सुधीर म्हाळसकर यांनी साईराजचे अभिनंदन केले व स्पर्धेसाठी शुभेच्छा दिल्या.
