खेळाडू विकास कार्यक्रमांसाठी १५ कोटींचे अनुदान
नवी दिल्ली ः भारतीय ऑलिम्पिक असोसिएशनच्या अंतर्गत वाद आणि प्रशासकीय अडथळ्यांचे निराकरण झाल्यानंतर आंतरराष्ट्रीय ऑलिंपिक समितीने मोठा निर्णय घेतला आहे. ऑलिम्पिक एकता कार्यक्रमांतर्गत भारतीय ऑलिम्पिक असोसिएशनला दिला जाणारा निधी पुन्हा सुरू करण्याची घोषणा आयओसीने केली आहे. गेल्या वर्षी हा निधी थांबवण्यात आला होता.
सीईओ रघुराम अय्यर यांच्या नियुक्तीवरून आयओएमध्ये वाद झाला होता, परंतु क्रीडा मंत्री मनसुख मांडविया यांच्या हस्तक्षेपानंतर, आयओए अध्यक्ष पीटी उषा आणि कार्यकारी परिषदेच्या असंतुष्ट सदस्यांमध्ये एक करार झाला. यानंतर, २४ जुलै रोजी अय्यर यांच्या नियुक्तीला औपचारिक मान्यता देण्यात आली आणि १३ ऑगस्ट रोजी झालेल्या सर्वसाधारण सभेत प्रलंबित अहवाल आणि आर्थिक लेखापरीक्षण देखील मंजूर करण्यात आले.
आयओसी संचालक जेम्स मॅकलिओड यांनी पीटी उषा यांना लिहिलेल्या पत्रात म्हटले आहे की, अलिकडच्या आठवड्यात आयओएने घेतलेल्या सुधारात्मक पावलांमुळे पारदर्शकता आणि एकतेचे वातावरण निर्माण झाले आहे. या आधारावर, आयओसीने भारतासाठी निधी पुनर्संचयित करण्याचा निर्णय घेतला आहे. भारतातील प्रस्तावित राष्ट्रीय क्रीडा प्रशासन कायदा क्रीडा संघटनांमध्ये सुशासन अधिक मजबूत करेल आणि ऑलिम्पिक चार्टरची भावना पुढे नेईल अशी आशा मॅकलिओड यांनी व्यक्त केली.
आयओसीचा हा निर्णय केवळ आयओएसाठी मोठा दिलासा देणारा नाही तर गेल्या एक वर्षापासून ज्या खेळाडूंचे विकास कार्यक्रम थांबले होते त्यांच्यासाठीही उत्साहवर्धक आहे. आता अनुदान पुनर्संचयित झाल्यानंतर, प्रशिक्षण आणि संसाधनांची उपलब्धता चांगली होईल.
