छत्रपती संभाजीनगर ः छत्रपती संभाजीनगर जिल्हा ज्युदो संघटनेच्या एमआयडीसी वाळूज येथील बजाजनगर व्यायाम व क्रीडा प्रसारक मंडळाच्या श्रीमती परमेश्वरी देवानी ज्युदो प्रशिक्षण केंद्रातील आणि तिसगावची सुवर्णकन्या आंतरराष्ट्रीय ज्युदो खेळाडू श्रद्धा कडुबाळ चोपडे हिची जकार्ता (इंडोनेशिया) येथे १३ व १४ सप्टेंबर रोजी होणाऱ्या ज्युनियर एशियन चॅम्पियनशिप ज्युदो स्पर्धेसाठी भारतीय ज्युदो संघात निवड झाली आहे. श्रद्धा या स्पर्धेसाठी इंडोनेशियाला रवाना झाली आहे.
श्रद्धा चोपडे हिने उत्तराखंड येथे झालेल्या नॅशनल गेम्स स्पर्धेत सुवर्णपदक मिळवले होते. महाराष्ट्रात खेळाचा मानाचा मानला जाणारा शिवछत्रपती राज्य क्रीडा पुरस्कार खेळाडू हा नुकताच श्रद्धा चोपडेला मिळाला आहे. श्रद्धा चोपडे हिने आतापर्यंत आंतरराष्ट्रीय स्पर्धेत ३ सुवर्णपदक, ३ रौप्य पदक, ३ कांस्य पदक, राष्ट्रीय स्पर्धेत १० सुवर्णपदक, ७ रौप्यपदक, २ कांस्यपदक मिळविली आहेत.
भोपाळ येथील साई क्रीडा प्रशिक्षण केंद्रातअर्जुन पुरस्कार प्राप्त यशपाल सोळंकी यांच्या मार्गदर्शनाखाली श्रद्धा चोपडे ही सराव करत आहे. आंतरराष्ट्रीय खेळाडू श्रद्धा चोपडे हिला प्रशिक्षक अर्जुन पुरस्कार प्राप्त यशपाल सोळंकी, भीमराज रहाणे, अशोक जंगमे, मधुश्री देसाई, शैलेश कावळे, कडूबाळ चोपडे यांचे मार्गदर्शन मिळत आहे.
एशियन चॅम्पियनशिप ज्युदो स्पर्धेसाठी भारतीय ज्युदो संघात निवड झाल्याबद्दल श्रद्धा चोपडे हिचे महाराष्ट्र ज्युदो संघटनेचे अध्यक्ष शैलेश टिळक, सचिव दत्ता आफ‌ळे, सतीश पहाडे, योगेश धाडवे, गणेश शेटकर, विजय धीमन, जिल्हा संघटनेचे अध्यक्ष अजित मुळे, सचिव अतुल बामणोदकर, जिल्हा क्रीडा अधिकारी बाजीराव देसाई, लता लोंढे, विश्वजित भावे, विश्वास जोशी, प्रसन्न पटवर्धन, भीमराज रहाणे, अशोक जंगमे, भास्कर जाधव, भीमाशंकर नावंदे, झिया अन्सारी, अमित साकला, संजय परळीकर, कुणाल गायकवाड, सुनील सिरस्वाल, मनिंदर बिलवाल, दत्तु पवार, बजाजनगर व्यायाम व क्रीडा प्रसारक मंडळाचे अध्यक्ष नंदुरी श्रीनिवास, मनोहर देवानी, अनिल पवार, नामदेव दौड, अभिजीत दळवी, सुधीर काटकर, विकास देसाई, शैलेश कावळे, सागर घुगे, राज जंगमे, उषा अंभोरे, ऋतुजा सौदागर, सायली राऊत, सुप्रिया जंगमे, ऋतुजा पाटील सर्व ज्युदो खेळाडू आणि पालक आदींनी अभिनंदन करून शुभेच्छा दिल्या.
