दुबई ः आशिया कपमध्ये रविवारी होणाऱया भारत आणि पाकिस्तान यांच्यातील सामन्याबाबत जोरदार चर्चा होत आहे. भारतीय संघाचे लक्ष पूर्णपणे या सामन्यावर आहे. भारतीय संघाचे फलंदाजी प्रशिक्षक सितांशू कोटक यांनी सांगितले की, जेव्हापासून भारतीय क्रिकेट नियामक मंडळाने आशिया कपमध्ये पाकिस्तानविरुद्ध खेळण्याच्या सरकारच्या निर्णयाला पाठिंबा दिला आहे, तेव्हापासून संघाचे लक्ष पूर्णपणे क्रिकेटवर आहे.
गेल्या काही काळापासून भारत आणि पाकिस्तानमधील संबंध खूपच तणावपूर्ण आहेत. पहलगाम मधील दहशतवादी हल्ल्याचा बदला घेण्यासाठी भारताने ऑपरेशन सिंदूरच्या नावाखाली लष्करी कारवाई केली होती. भारत आणि पाकिस्तानमधील तणावानंतर, ते पहिल्यांदाच क्रिकेटच्या मैदानावर एकमेकांसमोर येतील. भारताने आशिया कपमध्ये आपल्या मोहिमेची सुरुवात दणक्यात केली आणि युएईचा नऊ विकेट्सने पराभव केला.
भारतीय संघाच्या सराव सत्र दरम्यान पत्रकारांना कोटक म्हणाले, “बीसीसीआयने सरकारच्या निर्णयाला पाठिंबा देण्याचे सांगताच, आमचे लक्ष सामन्याकडे वळले. भारत आणि पाकिस्तानमधील सामना खूप मनोरंजक असेल. या दोन्ही संघांमधील सामना नेहमीच स्पर्धात्मक असतो.”
भारताने पाकिस्तानबाबत धोरण आखले होते
काश्मीरमधील दहशतवादी हल्ल्यानंतरच्या तणावामुळे क्रिकेटपटू खरोखरच अप्रभावित राहू शकतात का असे विचारले असता, कोटक म्हणाले, “खेळाडूंचे लक्ष मैदानावर आहे आणि त्यांच्या मनात दुसरे काहीही नाही.” काश्मीरमधील हल्ल्यानंतर, पाकिस्तानशी क्रिकेट संबंधांवर बहिष्कार घालण्याची मागणी तीव्र झाली होती. भारत सरकारने अलीकडेच एक धोरण आखले होते ज्यानुसार भारत कोणत्याही खेळात पाकिस्तानसोबत द्विपक्षीय सामने खेळणार नाही, परंतु आयसीसी किंवा इतर बहुराष्ट्रीय स्पर्धांमध्ये खेळत राहील.
