गुकेशला जागतिक क्रमवारीत फटका, टॉप टेनमधून बाहेर
मुंबई (प्रेम पंडित) ः बुद्धिबळ विश्वविजेता डी गुकेश हा सध्या खूप खराब फॉर्ममध्ये आहे. वर्ल्ड चॅम्पियन दिव्या देशमुख आणि गुकेश यांच्यातील डाव तब्बल सहा तास चालला आणि १०३ चालींनंतर बरोबरीत सुटला. त्यामुळे गुकेश याला क्रमवारीत मोठा फटका बसला असून तो टॉप १० मधून बाहेर पडला आहे.
महिला विश्वचषक विजेती ग्रँडमास्टर दिव्या देशमुख आणि गुकेश यांचा सामना फिडे ग्रँड स्विसच्या आठव्या फेरीत झाला. काळ्या सोंगट्यांनी खेळताना दिव्या देशमुखने गुकेश याला बरोबरीत रोखून एकच खळबळ उडवून दिली. दिव्या सुरुवातीपासूनच एका गुंतागुंतीच्या आणि किंचित खालच्या स्थितीत आली. परंतु कठोर संघर्ष केला आणि परिणामी शेवटच्या गेममध्ये बरोबरी साधण्यात यशस्वी झाली. गुकेशने बराच वेळ प्रयत्न केले आणि एकदा दिव्याला विजयासाठी खेळण्याची संधी मिळाली. पण ती त्याचा पुरेपूर फायदा घेऊ शकली नाही आणि रुक विरुद्ध रुक+नाईट एंडगेममध्ये प्रवेश केला.
दिव्याने परिश्रमपूर्वक बचाव केला आणि १०३ चाली खेळल्यानंतर बरोबरीत रोखण्यात तिचे स्थान राखण्यात यश मिळवले! दिव्यासाठी एक शानदार निकाल आहे. हा निकाल तिला अधिक भक्कम करेल.
या स्पर्धेत डी गुकेश याने पराभवाची हॅटट्रिक नोंदवली आहे. आता दिव्या देशमुखविरुद्ध झालेल्या बरोबरीनंतर गुकेश जागतिक क्रमवारीत पहिल्या दहा खेळाडूंमधून बाहेर पडला आहे. या कामगिरीबद्दल दिव्या देशमुख हिचे प्रचंड कौतुक होत आहे.
