कुस्तीगीर संघाचे कार्याध्यक्ष आणि भाजप क्रीडा आघाडीचे प्रदेशाध्यक्ष संदीप भोंडवे यांचा इशारा
पुणे : महाराष्ट्र ऑलिम्पिक असोसिएशनच्या मनमानी कारभाराविरोधात राज्यातील विविध क्रीडा संघटना येत्या २३ सप्टेंबरपासून तीव्र आंदोलन व आमरण उपोषण करणार असल्याचा इशारा महाराष्ट्र राज्य कुस्तीगीर संघाचे कार्याध्यक्ष आणि भारतीय जनता पक्षाच्या क्रीडा आघाडीचे प्रदेशाध्यक्ष संदीप भोंडवे यांनी शुक्रवारी पत्रकार परिषदेत केला.
नवी पेठेतील पत्रकार भवनात पत्रकार परिषद झाली. या प्रसंगी संदीप भोंडवे, अर्जुन पुरस्कार प्राप्त बॉक्सिंगपटू मनोज पिंगळे, राज्य कुस्तीगीर संघाचे उपाध्यक्ष विलास कथुरे, सरचिटणीस हिंद केसरी योगेश दोडके, शिवछत्रपती पुरस्कार प्राप्त मनोज एरंडे, हँडबॉल संघटेनचे सरचिटणीस राजाराम राऊत, सायकलिंग संघटनेचे संजय साठे, तायक्वांदो संघटनेचे मिलिंद पाठारे आदी पदाधिकारी उपस्थित होते.
संदीप भोंडवे म्हणाले की, ‘महाराष्ट्र ऑलिम्पिक संघटनेचे सरचिटणीस नामदेव शिरगावकर यांनी १५ सप्टेंबर रोजी परिपत्रक काढून २ नोव्हेंबर रोजी महाराष्ट्र ऑलिम्पिक असोसिएशनची वार्षिक सर्वसाधारण सभा व निवडणूक होणार असल्याचे जाहीर केले. तसेच निवडणुकीत मतदानासाठी पात्र अशा २२ क्रीडा संघटनांची यादी देखील जाहीर केली. या यादीतून कबड्डी, कुस्ती, बॉक्सिंग, हँडबॉल, जलतरण या संघटनांना वगळण्यात आले. यापूर्वीच्या निवडणुकीत या पाचही क्रीडा संघटना मतदानासाठी पात्र होत्या. महाराष्ट्र ऑलिम्पिक असोसिएशनशी संलग्नित ४७-४८ राज्य क्रीडा संघटना असतानाही केवळ २२ संघटनांना नामदेव शिरगावकर यांनी मतदानासाठी पात्र ठरवले आहे. त्यांनी हे जाणीवपूर्वक केले असून त्यामुळे राज्यातील खेळाडूंचे मोठे नुकसान होणार आहे असे संदीप भोंडवे यांनी यावेळी सांगितले.
गुजरात, उत्तराखंड, गोवा या ठिकाणी झालेल्या राष्ट्रीय क्रीडा स्पर्धेच्यावेळी खेळाडूंसाठी महाराष्ट्र सरकारने दरवर्षी चार कोटीप्रमाणे तीन नॅशनल गेम्ससाठी १२ कोटींचा निधी दिला आहे. मात्र, महाराष्ट्र ऑलिम्पिक असोसिएशनकडून या निधीच्या विनियोगाचा तपशील सादर करण्यात आलेला नाही. यात प्रचंड गैरप्रकार झाल्याचे प्रथमदर्शनी दिसून येत आहे. शिरगावकर यांच्या मनमानी कारभाराला विविध क्रीडा संघटना व त्यांचे पदाधिकारी आक्रमक झाले असल्याचे संदीप भोंडवे यांनी सांगितले.
महाराष्ट्र ऑलिम्पिक असोसिएशनला संलग्न सर्व राज्य क्रीडा संघटनांना मतदानाचा अधिकार प्राप्त व्हावा, तसेच तीन राष्ट्रीय क्रीडा स्पर्धेसाठी शासनाने दिलेल्या कोट्यवधी रुपयांचा हिशेब महाराष्ट्र ऑलिम्पिक संघटनेचे अध्यक्ष अजित पवार व सरचिटणीस नामदेव शिरगावकर यांनी राज्य शासनास सादर करावा अशी आमची मागणी आहे असे संदीप भोंडवे यांनी यावेळी सांगितले. या दोन्ही मागण्या मान्य होण्यासाठी येत्या २३ सप्टेंबर रोजी दुपारी १२ वाजता जिल्हाधिकारी कार्यालय पुणे येथून आंदोलनास सुरुवात होईल. महाराष्ट्र ऑलिम्पिक असोसिशन कार्यालयाबाहेर आमरण उपोषण करण्यात येणार आहे. या आंदोलनात विविध राज्य क्रीडा संघटनांचे पदाधिकारी, राष्ट्रीय-आंतरराष्ट्रीय खेळाडू सहभागी होणार असून साखळी उपोषण करणार आहेत असे संदीप भोंडवे यांनी सांगितले.
