ठाणे ः बालपणापासूनच खेळाडू घडवून त्यांची पायाभरणी मजबूत करण्याचे ध्येय ठेऊन कार्यरत असलेल्या ठाणे बॅडमिंटन अकॅडमीच्या सैयद मोदी कोचिंग योजनेतील खेळाडूंनी यंदा विविध शालेय व विभागीय स्पर्धांमध्ये दणदणीत यश मिळवत आपल्या चमकदार कामगिरीची नोंद केली आहे.
इंटर-स्कूल बॅडमिंटन अजिंक्यपद स्पर्धेत योहान नायरने मुलांच्या १० वर्षाखालील एकेरी गटात अजिंक्यपद पटकावले. उपांत्य फेरीत त्याने किआन जैनवर २१-६, २१-८ असा झंझावाती विजय मिळवला तर अंतिम सामन्यात झीयान घिया याला १५-२१, २५-२३, १८-२१ अशा टप्प्याटप्प्याने पराभूत करत सुवर्णपदकावर आपले नाव कोरले.
याच स्पर्धेत मयंक राजपूतने १४ वर्षाखालील गटात दमदार खेळी सादर करत विजेतेपद मिळवले. उपांत्य फेरीत काव्या परमारवर २१-१४, २१-१७ असा विजय मिळवून तो थेट अंतिम फेरीत गेला, जिथे त्याने अर्जुन राऊतला २१-९, २१-११ अशा सरळ दोन गेममध्ये हरवले.
दरम्यान, अभिलाषा शिरगावकरने ठाणे जिल्हा १४ वर्षाखालील मुलींच्या एकेरी गटात सर्व सामने जिंकत सातारा इंटर-झोनल विभागीय स्पर्धेसाठी आपली निवड निश्चित केली. यशवंत इंटरनॅशनल स्कूलचं प्रतिनिधित्व करताना अभिलाषाने स्वतःसह आपल्या शाळेसाठीदेखील पहिल्यांदाच हा मान पटकावला आहे. तसेच, पियूष सुतारने इंट्रा आयईएस बॅडमिंटन स्पर्धेत १० वर्षाखालील मुलांच्या एकेरी गटात सुवर्णपदक जिंकत अकॅडमीच्या पदक-संचयात भर घातली.
या यशामध्ये खेळाडूंना दिलेल्या सातत्यपूर्ण मार्गदर्शनासाठी प्रशिक्षकांचे विशेष कौतुक करण्यात आले आहे. अकादमीचे प्रशिक्षक अक्षय देवलकर, अमित गोडबोले, एकेंद्र दार्जी, प्रसेनजीत शिरोडकर, फुलचंद पासी आणि ऋषिकेश जोगळेकर यांच्या मेहनतीमुळे खेळाडूंनी अशा स्तरावर यश संपादन केले.
“लहान वयापासूनच योग्य मार्गदर्शन व शिस्तबद्ध प्रशिक्षण मिळाल्यास मुलांच्या पायाभरणीला बळ मिळते. भविष्यात राष्ट्रीय व आंतरराष्ट्रीय स्तरावर यश संपादन करण्यासाठी ही पायरी महत्त्वाची ठरते,” असे ठाणे बॅडमिंटन अकॅडमीचे मुख्य प्रशिक्षक श्रीकांत वाड यांनी सांगितले.
या उत्कृष्ट यशाबद्दल ठाणे महानगरपालिका क्रीडा उपायुक्त मीनल पालांडे यांनी संपूर्ण संघाचे अभिनंदन केले असून, भविष्यात आणखी मोठ्या पातळीवर यश संपादन करण्यासाठी शुभेच्छा दिल्या आहेत.
