तुळजापूरच्या मुलींनी लातूर विभागीय स्पर्धेसाठी मजल मारली
तुळजापूर (जि. धाराशिव) : शिक्षण प्रसारक मंडळ अणदूर संचलित श्री कुलस्वामिनी विद्यालय, तुळजापूर येथील खेळाडूंनी जिल्हास्तरीय शालेय सेपक टकरा स्पर्धेत उल्लेखनीय कामगिरी करत सर्वांचे लक्ष वेधून घेतले आहे. मुलींच्या १४ वर्षे व १७ वर्षे गटात प्रथम क्रमांक पटकवत लातूर विभागीय स्पर्धेसाठी पात्रता मिळवली, तर इतर गटांमध्ये विद्यालयाच्या संघांनी उल्लेखनीय कामगिरी बजावली.
१४ वर्षे मुलींच्या विजयी संघाची दमदार कामगिरी
१४ वर्षे मुलींच्या गटात श्री कुलस्वामिनी विद्यालयाने उत्तम संघभावना आणि कौशल्य दाखवत जिल्हा विजेतेपद पटकावले. या विजयी संघात कर्णधार आरोही काळे, कीर्ती ढाले, कार्तिकी तेवर, शांभवी जगदाळे आणि जागृती पवेकर या खेळाडूंचा समावेश होता. या सर्वांनी अत्यंत समन्वय आणि चपळतेने खेळ साकारत प्रतिस्पर्ध्यांना पराभूत केले.
१७ वर्षे मुलींचा संघही विजेता
१७ वर्षे मुलींच्या गटातही विद्यालयाने विजयश्री मिळवली. या विजयी संघात पूर्वा दळवी, संस्कृती जाधव, अक्षरा जाधव, गायत्री जाधव आणि श्रुती मुकुटराव या खेळाडूंचा समावेश होता. या दोन्ही मुलींच्या संघांनी लातूर विभागीय पातळीवरील स्पर्धेसाठी पात्रता निश्चित केली असून, विद्यालयाने जिल्हास्तरावर दणदणीत विजयाची नोंद केली आहे.
मुलांच्या गटातीलही प्रभावी कामगिरी
मुलांच्या विभागातही खेळाडूंनी दमदार खेळ करून शाळेची छाप उमटवली. १४ वर्षे मुलांच्या गटात संघाने उपविजेतेपद, तर १७ व १९ वर्षे मुलांच्या गटात तृतीय क्रमांक मिळवला. १४ वर्षे गटातील संघात कर्णधार पृथ्वीराज माने, शिवम देवकर, कृष्णा कोळी, सौदागर पौल व शंभूराज पवार हे खेळाडू होते.
१७ वर्षे गटातील संघात दादासाहेब देशमुख, गजानन जगताप, ओम जगताप, करण गुंड व सागर यादव, तर १९ वर्षे गटात प्रणव साळवे, गणेश फुलसुंदर, केदार डाले, आर्यन डाले आणि रुद्र इंगळे यांनी तृतीय क्रमांक पटकावला.
प्रशिक्षण व मार्गदर्शनाचा पाया
या यशामागे विद्यालयाचे क्रीडा शिक्षक अनिल धोत्रे सरांचे कुशल प्रशिक्षण आणि सातत्यपूर्ण प्रयत्न निर्णायक ठरले. त्यांनी खेळाडूंना तांत्रिक कौशल्य, संघभावना आणि क्रीडा शिस्त यांचे उत्तम धडे दिले.
संस्थेचा गौरव आणि शुभेच्छा वर्षाव
या उल्लेखनीय यशाबद्दल विद्यालयाचे सचिव रामचंद्र (दादा) आलुरे, ज्येष्ठ विधीज्ञ व मार्गदर्शक ॲड. लक्ष्मीकांत पाटील, ॲड. नागनाथ कानडे, मुख्याध्यापक सिद्धेश्वर कबाडे, ज्येष्ठ शिक्षक अशोक सोमवंशी, सांस्कृतिक प्रमुख दिलीप भालेराव, राजू ससाणे, धनाजी राऊत, बालाजी कोणे, वैशाली कासार मॅडम, मैंदर्गी मॅडम, प्रदीप बिरादार, गवळी, दत्ता राऊत यांनी खेळाडू आणि मार्गदर्शक शिक्षकांचे अभिनंदन केले. विजयी संघांना विभागीय स्पर्धेसाठी यशस्वी कामगिरीच्या शुभेच्छा दिल्या.
श्री कुलस्वामिनी विद्यालयाचा मान वाढवणारा विजय
सेपक टकरा या खेळात एकजूट, चपळाई आणि जलद निर्णयक्षमता आवश्यक असते. या सर्व गुणांचा प्रत्यय श्री कुलस्वामिनी विद्यालयाच्या खेळाडूंनी उत्कृष्टरीत्या दिला आहे. या विजयामुळे तुळजापूर तालुक्यातील शाळेचा क्रीडा क्षेत्रातील मान उंचावला असून, आगामी विभागीय स्पर्धेतही हे खेळाडू चमक दाखवतील, असा विश्वास सर्वांनी व्यक्त केला.
