१९ वर्षांखालील गटात विभागीय विजेतेपद, १७ वर्षांखालील गटात तृतीय क्रमांक
बोरगाव (जि. नाशिक) ः मविप्र आश्रमशाळा, मोहपाडा (ता. सुरगाणा) येथील मुलींनी उत्कृष्ट कामगिरी करत व्हॉलीबॉल स्पर्धेत विभागीय पातळीवर विजेतेपद पटकावले आहे. या कामगिरीमुळे या संघाची राज्यस्तरीय स्पर्धेसाठी निवड झाली आहे. तसेच, शाळेच्या १७ वर्षांखालील मुलींच्या संघाने विभागीय स्पर्धेत तृतीय क्रमांक मिळवून यशाची नोंद केली आहे.
धुळे येथील गरुड मैदानावर शालेय १९ वर्षांखालील मुलींची व्हॉलीबॉल स्पर्धा पार पडली. नाशिक ग्रामीण संघाकडून खेळताना मोहपाडा आश्रमशाळेच्या खेळाडूंनी दमदार खेळ सादर केला. प्रथम फेरीत संघाने धुळे ग्रामीण व मालेगाव मनपा या संघांचा पराभव करून अंतिम फेरीत प्रवेश मिळवला.
अंतिम सामना नाशिक ग्रामीण विरुद्ध जळगाव ग्रामीण असा रंगला. मोहपाडा आश्रम शाळेच्या मुलींनी नाशिक ग्रामीण संघाकडून खेळताना जळगाव ग्रामीण संघाचा २५-९ व २५-१४ अशा गुणफरकाने दणदणीत पराभव करत विभागीय विजेतेपदावर नाव कोरले.
या विजेत्या संघात हर्षाली बाळू चव्हाण, अंजली सुरेश गवळी, भूमिका यशवंत गायकवाड, अर्चना वसंत चौधरी, सोनी काशिनाथ बागुल, कामिनी कांतीलाल जाधव, रंजना हिरामण गांगुर्डे, राणी एकनाथ बागुल, ज्योती हिरामण गांगुर्डे, मयुरी हरी बागुल, पूजा रामचंद्र पवार व आरती यशवंत गायकवाड यांचा समावेश होता.
सर्व खेळाडूंना शिक्षक कैलास चौधरी यांचे प्रशिक्षण आणि मार्गदर्शन लाभले. या विजयानंतर मुख्याध्यापक दीपक कणसेपाटील, संतोष गौळी तसेच शाळेतील सर्व शिक्षक व कर्मचारी यांनी संघाचे मनःपूर्वक अभिनंदन करत राज्यस्तरीय स्पर्धेसाठी शुभेच्छा दिल्या.
