जळगाव : जळगाव जिल्ह्यातील प्रख्यात क्रिकेट प्रशिक्षक पंकज महाजन यांनी बीसीसीआयच्या लेव्हल-२ कोचिंग कोर्ससाठी पात्रता मिळवून खानदेशचा मान वाढवला. ही परीक्षा ३१ ऑगस्ट ते २ सप्टेंबर २०२५ दरम्यान बंगळुरू येथील नॅशनल क्रिकेट अकॅडमीमध्ये पार पडली.
पंकज महाजन यांनी २०२२ मध्ये बीसीसीआय लेव्हल-१ परीक्षा यशस्वीरीत्या उत्तीर्ण केली होती. त्याआधी त्यांनी महाराष्ट्र क्रिकेट असोसिएशनची लेव्हल-० परीक्षा उत्तीर्ण करून लेव्हल-१ साठी प्रवेश मिळवला होता. त्यामुळे पंकज महाजन हे खानदेशातील एकमेव प्रशिक्षक आहेत जे बीसीसीआय लेव्हल-१ पूर्ण करून लेव्हल-२ साठी पात्र झाले आहेत. ते २००४ पासून एकलव्य क्रीडा संकुलात क्रिकेट प्रशिक्षक असून, २०१९ पासून द्वारकाई टॅलेंट सर्च क्रिकेट अकॅडमीचे संचालक आहेत. त्यांच्या मार्गदर्शनाखाली अनेक जळगाव जिल्ह्यातील तसेच महाराष्ट्रातील क्रिकेटपटूंनी राष्ट्रीय व राज्यस्तरीय यश संपादन केले आहे.
पंकज महाजन यांना बीसीसीआय लेव्हल-१ साठी अतुल गायकवाड, मंदार दळवी, रंजीत देसाई, दिनेश नानावटी, माजी यष्टिरक्षक साबा करीम, नंदुरबारचे सचिव युवराज पाटील, त्रिपुराचे मुख्य प्रशिक्षक संदीप दहाड, डॉ श्रीकृष्ण बेलोरकर यांचे मार्गदर्शन लाभले. त्यांच्या या यशाबद्दल द्वारकाई स्पोर्ट्स व द्वारकाई टॅलेंट सर्च क्रिकेट अकॅडमीचे अध्यक्ष विशाल खडके, सहकारी प्रशिक्षक, मित्रमंडळी व खेळाडूंनी मनःपूर्वक अभिनंदन करत भविष्यातील आणखी यशासाठी शुभेच्छा दिल्या.
