पुणे : पुणे जिल्हा क्रीडा अधिकारी कार्यालय, पुणे महानगरपालिका आणि पुणे शहर बॉक्सिंग संघटना यांच्या संयुक्त विद्यमाने आयोजित १४ वर्षांखालील मुलांची आंतरशालेय बॉक्सिंग स्पर्धा ही जनरल अरुणकुमार वैद्य स्टेडियम, भवानी पेठ, पुणे येथे अत्यंत उत्साहपूर्ण वातावरणात पार पडली.
या स्पर्धेत पुणे शहरातील विविध शाळांमधील तब्बल १३४ खेळाडूंनी सहभाग नोंदवून मैदानावर खऱ्या अर्थाने क्रीडा महोत्सवाची रंगत निर्माण केली. स्पर्धेदरम्यान खेळाडूंच्या जिद्दी, वेग, अचूक पंच आणि खेळभावनेने उपस्थितांना रोमांचित केले.
विजेत्यांची नावे
३० किलो : हार्दिक वेंगुरलेकर (एस एस अग्रवाल), ३२ किलो: आयुष बोडरे (ऑनलर्स हायस्कूल), ३४ किलो : सम्यक कांबळे (एसएनबीएम), ३६ किलो : पियुष चौधरी (एसएम वाळूबेन पट), ३८ किलो : योग शर्मा (वॉलनेट स्कूल), ४० किलो: समर्थ सोनवणे (विद्यानिकेतन), ४२ किलो : श्रीजीत पवार (अभिनव विद्यालय), ४४ किलो : स्पंदन खाडेराव (डॉन बॉस्को),४६ किलो : चिन्मय महाजन (अभिनव विद्यालय), ४८ किलो : कुरेशी वहाब (नवभारत विद्यालय), ५० किलो : साई भंडारी (एंजल मिकी स्कूल).
सर्व विजेत्या खेळाडूंची पुणे विभागीय बॉक्सिंग स्पर्धेसाठी निवड करण्यात आली असून, यामुळे शालेय स्तरावरील बॉक्सिंगमध्ये नवा उत्साह निर्माण झाला आहे.
मान्यवरांची उपस्थिती व शानदार समारोप
समारोप प्रसंगी पुणे शहर बॉक्सिंग संघटनेचे अध्यक्ष अविनाश बागवे यांनी विजेत्या खेळाडूंना शुभेच्छा देत “क्रीडाभाव आणि शिस्त हेच खऱ्या विजयानं घडवतात” असे प्रतिपादन केले. या वेळी महाराष्ट्र बॉक्सिंग असोसिएशनचे माजी सचिव भरतकुमार व्हावळ, राष्ट्रीय टेक्निकल अधिकारी अजित ओसवाल, पुणे जिल्हा बॉक्सिंग संघटनेचे सचिव अभिमन्यू सूर्यवंशी, पुणे शहर बॉक्सिंग असोसिएशनचे उपाध्यक्ष सुरेशकुमार गायकवाड, जीवनलाल निंदाने, पिंपरी-चिंचवड बॉक्सिंग संघटनेचे सचिव मनोज यादव, तसेच राष्ट्रीय पदकविजेते प्रमोद जाधव हे मान्यवर उपस्थित होते.
स्पर्धेच्या सूत्रसंचालनाची जबाबदारी पुणे महानगरपालिकेचे क्रीडा अधिकारी विकास काटे यांनी पार पाडली. वैद्यकीय सुविधा सोनवणे हॉस्पिटल, पुणे यांनी उपलब्ध करून दिल्या.
संघटनात्मक व व्यवस्थापन योगदान
या स्पर्धेच्या यशस्वी आयोजनासाठी पुणे जिल्हा, पुणे शहर आणि पिंपरी-चिंचवड येथील पात्र पंचांनी काटेकोर आणि पारदर्शक निकाल सुनिश्चित केला. पुणे शहर बॉक्सिंग संघटनेचे सचिव आणि आंतरराष्ट्रीय कोच विजय गुजर यांनी सर्व मान्यवर, खेळाडू, प्रशिक्षक, पंच, पालक आणि वैद्यकीय अधिकारी यांचे मनःपूर्वक आभार मानले.स्पर्धेस नजीर सय्यद, रॉबर्ट दास, संजय यादव, जयंत शिंदे, चेतना वारे, कुणाल पालकर, आसिफ शेख, प्रदीप वाघे, अमन शर्मा, साहिल सरोदे, अंजनीकुमार जोगदंड, प्रमोद वाघे आदी मान्यवर उपस्थित होते.
स्पर्धेचा ठसा
या आंतरशालेय स्पर्धेतून पुणे शहरातल्या लहान वयातील खेळाडूंमध्ये खेळाची शिस्त, आत्मविश्वास आणि राष्ट्रीय पातळीवर पोहोचण्याची प्रेरणा निर्माण झाली. आयोजकांच्या प्रयत्नामुळे पुणे बॉक्सिंगचा दर्जा आणखी उंचावला आहे.
