डी ११ टी २० लीग क्रिकेट ः अन्सारी अझर अहमद, अनिल थोरे, धीरज बहुरे, तनवीर राजपूत सामनावीर
छत्रपती संभाजीनगर ः डी स्पोर्ट्स प्रेझेंट्स डी ११ टी २० लीग क्रिकेट स्पर्धेत एमके डेव्हलपर्स, मायटी ग्लॅडिएयर, यंग ११, डीएफसी श्रावणी या संघांनी दमदार विजय नोंदवत आपली आगेकूच कायम ठेवली. या सामन्यांमध्ये अन्सारी अझर अहमद, अनिल थोरे, धीरज बहुरे आणि तनवीर राजपूत यांनी सामनावीर पुरस्कार पटकावला.
रुफीट क्रिकेट मैदानावर ही स्पर्धा होत आहे. एम के डेव्हलपर्स संघाने पूरब जैस्वाल संघावर सहा विकेट राखून मोठा विजय साकारला. यात पूरब जैस्वाल संघाने प्रथम फलंदाजी करत २० षटकात सर्वबाद १६१ धावा काढल्या. त्यानंतर एम के डेव्हलपर्स संघाने १६ षटकात चार बाद १६२ धावा फटकावत शानदार सात विकेटने सामना जिंकला.
यात अन्सारी अझर अहमद याने तुफानी फलंदाजी केली. त्याने ३९ चेंडूंत ६८ धावा काढल्या. त्याने १३ चौकार मारले. सचिन शेंडगे याने अवघ्या १३ चेंडूंत ३३ धावांची वादळी खेळी केली. त्याने दोन उत्तुंग षटकार व पाच चौकार मारले. लक्ष बाबर याने ३० चेंडूंत दोन षटकारांसह ३२ धावांचे योगदान दिले.
गोलंदाजीत आमेर बदाम याने २२ धावांत तीन गडी बाद केले. नासेर खान याने ३२ धावांत तीन विकेट घेतल्या. अन्सारी अझर अहमद याने ३८ धावांत दोन बळी घेऊन अष्टपैलू कामगिरी नोंदवली. त्यामुळे तो सामनावीर पुरस्काराचा मानकरी ठरला.
झैनब सहारा टीम पराभूत
मायटी ग्लॅडिएटर संघाने झैनब सहारा क्लबचा ५३ धावांनी पराभव केला. या लढतीत मायटी ग्लॅडिएटर संघाने प्रथम फलंदाजी करत १९.४ षटकात आठ बाद १५२ धावा काढल्या. झैनब सहारा संघ १५ षटकात ९९ धावांवर सर्वबाद झाला. मायटी ग्लॅडिएटर संघ ५३ धावांनी विजयी झाला.
या सामन्यात अविनाश मोटे याने ५० चेंडूत ६६ धावा काढल्या. त्याने आठ चौकार मारले. आकाश विश्वकर्मा याने ३५ चेंडूत ५५ धावांची आक्रमक अर्धशतकी खेळी केली. त्याने चार उत्तुंग षटकार व तीन चौकार मारले. जावेद याने २३ चेंडूत चार चौकार व एक षटकार ठोकत ३१ धावांचे योगदान दिले.
गोलंदाजीत अनिल थोरे याने शानदार स्पेल टाकला. त्याने अवघ्या दोन धावांत चार विकेट घेऊन सामना गाजवला. अमोल दौड याने १८ धावांत तीन गडी बाद केले. झमीर याने ११ धावांत दोन विकेट घेतल्या.
लकी क्लब पराभूत
लकी क्रिकेट क्लब आणि यंग ११ यांच्यात सुरेख सामना झाला. हा सामना यंग ११ संघाने सात विकेट राखून जिंकला. यात लकी क्रिकेट क्लबने २० षटकात नऊ बाद १२८ धावा काढल्या. यंग ११ संघाने १६ षटकात तीन बाद १३० धावा फटकावत सात विकेटने सामना जिंकला.
या सामन्यात धीरज बहुरे याने ४५ चेंडूत ६१ धावांची दमदार खेळी केली. त्याने सहा चौकार व तीन षटकार मारले. इम्रान अहमद याने ४३ चेंडूत ४४ धावांची वेगवान खेळी केली. त्याने एक षटकार व चार चौकार मारले. राहुल शर्मा याने ३२ चेंडूत ४३ धावांची आक्रमक खेळी साकारली. त्याने चार चौकार व एक षटकार मारला.
गोलंदाजीत धीरज बहुरे याने प्रभावी कामगिरी नोंदवत ९ धावांत दोन गडी बाद केले. अष्टपैलू कामगिरीमुळे धीरज सामनावीर ठरला. अमित पाठक याने १८ धावांत दोन विकेट घेतल्या. सय्यद अब्दुल वाहीद याने ३३ धावांत दोन बळी घेतले.
राऊडी सुपर किंग पराभूत
डीएफसी श्रावणी संघाने राऊडी सुपर किंग संघाचा २५ धावांनी पराभव केला. या सामन्यात डीएफसी श्रावणी संघाने २० षटकात नऊ बाद १५६ अशी आव्हानात्मक धावसंख्या उभारली. या धावसंख्येचा पाठलाग करताना राऊडी सुपर किंग संघ १६ षटकात नऊ बाद १३१ धावा काढू शकला. डीएफसी श्रावणी संघाने २५ धावांनी सामना जिंकला.
रमेश साळुंके याने २७ चेंडूंत ४१ धावांचा दमदार खेळी केली. त्याने पाच चौकार व दोन षटकार ठोकले. मोहम्मद वसीम याने २४ चेंडूंत ३२ धावा काढल्या. त्याने तीन चौकार मारले. पंकज याने पाच चौकारांसह २४ धावांची वेगवान खेळी केली.
गोलंदाजीत श्रेयस बनसोड याने २२ धावांत पाच विकेट घेऊन सामना गाजवला. त्याने घातक गोलंदाजी केली. सुरज गोंड याने ११ धावांत तीन गडी बाद केले. तनवीर राजपूत याने ३५ धावांत तीन गडी बाद करुन आपला ठसा उमटवला.
