मुंबई ः आनंदराव अडसूळ चॅरिटेबल ट्रस्ट व आयडियल स्पोर्ट्स अकॅडमी आयोजित अडसूळ ट्रस्ट-कोकण कप राज्यस्तरीय सुपर लीग विनाशुल्क शालेय कॅरम स्पर्धेत न्यू इंग्लिश स्कूल-जैतापूरचा आर्यन राऊत अजिंक्य ठरला.
डावाच्या मध्यापर्यंत ८-४ अशी आघाडी घेणाऱ्या तिसऱ्या टप्प्यामधील विजेत्या प्रसन्न गोळेला अखेर अंतिम सहाव्या टप्प्यामधील स्पर्धेत निर्विवाद वर्चस्व राखणाऱ्या आर्यन राऊतने १७-१२ असे चकविले.आर्यनने सर्वाधिक साखळी दहावा गुण वसूल करून स्पर्धेवर निर्विवाद वर्चस्व मिळवले.
को-ऑपरेटीव्ह बँक एम्प्लॉईज युनियन-मुंबई व कोकण क्रीडा प्रबोधिनी यांच्या सहकार्याने झालेल्या एकूण सहा टप्प्यामधील स्पर्धेत मुंबई शहर व उपनगर, ठाणे, पालघर, रायगड, रत्नागिरी, सिंधुदुर्ग जिल्ह्यातील एकूण २१८ शालेय खेळाडूंनी सहभाग नोंदविला होता. अंतिम स्पर्धेमध्ये प्रसन्न गोळे व पुष्कर गोळे यांनी साखळी ८ गुणांसह संयुक्त द्वितीय; राष्ट्रीय ख्यातीची ज्युनियर कॅरमपटू तनया दळवी व उमैर पठाण यांनी साखळी ७ गुणांसह संयुक्त तृतीय तर पाचव्या टप्प्यातील विजेत्या तीर्थ ठाकर, शौर्य दिवेकर, ग्रीष्मा धामणकर, शिवांश मोरे, दुर्वेश चव्हाण, विराज बर्वे यांनी साखळी ६ गुणांसह संयुक्त चौथ्या क्रमांकाचा पुरस्कार पटकाविला.
या स्पर्धेत उत्तम खेळ करणारे उदयोन्मुख शालेय खेळाडू वेदिका पोमेंडकर, रविराज गायकवाड, एन्जेल पटवा, ओम सुरते, आरव आंजर्लेकर, आर्या सोनार, चैतन्य पोमेंडकर यांनी उत्तेजनार्थ पुरस्कार मिळविला. ट्रस्टचे सचिव विष्णू तांडेल, युनियनचे कोषाध्यक्ष प्रमोद पार्टे, क्रीडा प्रेमी संजय मांजरेकर, पंच चंद्रकांत करंगुटकर, अर्जुन कालेकर व अविनाश महाडिक, शिवछत्रपती पुरस्कार प्राप्त लीलाधर चव्हाण आदींच्या प्रमुख उपस्थितीत विजेत्यांना गौरविण्यात आले. स्पर्धा यशस्वी करण्यासाठी को-ऑप बँक एम्प्लॉईज युनियनचे अध्यक्ष आनंदराव अडसूळ यांच्या मार्गदर्शनाखाली युनियनचे व आयडियल अकॅडमीचे सर्व पदाधिकारी कार्यरत होते.
