योग, क्रीडा व शारीरिक शिक्षण क्षेत्रातील पुण्याचा गौरव
क्रीडा विज्ञान आणि शारीरिक शिक्षण क्षेत्रातील उल्लेखनीय योगदानाची दखल घेत, पुण्याचे प्रतिष्ठित क्रीडा शिक्षक आणि संशोधक डॉ नामदेव विष्णू फटांगरे यांना श्रीलंका येथे होणाऱ्या आंतरराष्ट्रीय परिषदेसाठी निमंत्रित करण्यात आले आहे.
६ ते ८ नोव्हेंबर २०२५ दरम्यान सबरागामुवा विद्यापीठ, बालांगोडा, श्रीलंका यांच्या क्रीडा विज्ञान व शारीरिक शिक्षण विभागातर्फे हिक्काडुवा येथे आयोजित होणाऱ्या “दुसऱ्या आंतरराष्ट्रीय अप्लाइड स्पोर्ट्स परिषदेत” भारताचे प्रतिनिधित्व करण्याची संधी डॉ फटांगरे यांना मिळाली आहे.
१५ वर्षांपासून व्हीआयटी पुणे येथे क्रीडा क्षेत्रातील उल्लेखनीय कार्य
बन्सीलाल रामनाथ अगरवाल चॅरिटेबल ट्रस्ट संचलित विश्वकर्मा इन्स्टिट्यूट ऑफ टेक्नॉलॉजी (व्हीआयटी), पुणे या स्वायत्त अभियांत्रिकी महाविद्यालयात क्रीडा संचालक म्हणून डॉ नामदेव फटांगरे मागील पंधरा वर्षांपासून प्रभावीपणे काम करत आहेत.
विद्यार्थ्यांचा सर्वांगीण विकास, क्रीडा संस्कृतीचा प्रसार, शारीरिक व मानसिक आरोग्य संवर्धन, योगाचा जीवनशैलीत समावेश आणि खेळाद्वारे व्यक्तिमत्त्व विकास यासाठी त्यांचे योगदान विशेष उल्लेखनीय आहे.
संशोधन, योग आणि क्रीडा शिक्षणातील भरीव कामगिरी
डॉ फटांगरे यांनी मलेशिया तसेच भारतातील विविध राज्यांमध्ये आयोजित आंतरराष्ट्रीय व राष्ट्रीय परिषदांमध्ये शारीरिक शिक्षण, क्रीडा आणि योग क्षेत्रातील महत्त्वपूर्ण विषयांवर संशोधन निबंध सादर केले आहेत.
आजपर्यंत त्यांच्या नावावर २४ संशोधन निबंध (आंतरराष्ट्रीय, राष्ट्रीय आणि राज्यस्तरीय) आणि क्रीडा व योग क्षेत्रातील २ पुस्तके प्रकाशित आहेत.
त्यांच्या संशोधनात विद्यार्थ्यांचा सर्वांगीण विकास, आधुनिक जीवनशैलीमुळे उद्भवणाऱ्या शारीरिक-मानसिक समस्या आणि त्यावरील योगाधारित उपाय, तसेच क्रीडा शिक्षणातील नवनवीन पद्धतींचा अभ्यास यांचा विशेष समावेश आहे.
श्रीलंकेत सादर होणारा संशोधन विषय
या आंतरराष्ट्रीय परिषदेत डॉ नामदेव फटांगरे यांचा संशोधन पेपर खालील विषयावर सादर होणार आहे : “शिक्षकांमधील ट्रंक जॉइंट मोबिलिटीवर सूर्यनमस्कार पद्धतीचा प्रभाव”. हा विषय शिक्षकांच्या आरोग्यावर केंद्रित असून सूर्यनमस्काराच्या नियमित सरावामुळे देहबांध्यातील लवचिकता, हालचालक्षमतेत होणारे सकारात्मक बदल आणि संपूर्ण आरोग्यावर होणारा परिणाम स्पष्ट करणारा आहे.
अभिनंदन व शुभेच्छांचा वर्षाव
या मानाच्या निवडीबद्दल भरतजी अगरवाल – अध्यक्ष, बीआरएसीटी, डॉ बिपीन सुळे – सीईओ, विश्वकर्मा ग्रुप, डॉ राजेश जालनेकर – संचालक, व्हीआयटी, डॉ विवेक देशपांडे आणि डॉ वैशाली पाटील यांच्यासह महाविद्यालयातील सर्व प्राध्यापक, शिक्षकेत्तर कर्मचारी आणि विद्यार्थ्यांनी डॉ फटांगरे यांचे मनःपूर्वक अभिनंदन करत त्यांच्या भावी कार्यासाठी शुभेच्छा दिल्या.
क्रीडा, संशोधन आणि योग – त्रिवेणी साधणारे व्यक्तिमत्त्व
क्रीडा शिक्षणाला फक्त स्पर्धा किंवा शारीरिक तंदुरुस्ती एवढ्यापुरते मर्यादित न ठेवता, जीवनशैली, आरोग्य, संस्कार आणि व्यक्तिमत्त्व विकासाचा माध्यम म्हणून त्याचा प्रसार करण्याचे कार्य डॉ फटांगरे सातत्याने करत आहेत.
त्यांचा प्रवास आजच्या तरुण संशोधक, क्रीडा शिक्षक आणि विद्यार्थ्यांसाठी प्रेरणादायी आहे.
