मुंबई ः महाराष्ट्र राज्य कबड्डी असोसिएशनच्या मान्यतेने पुणे जिल्हा कबड्डी असोसिएशनच्या यजमान पदाखाली राकेश घुले कबड्डी संघ यांच्या विद्यमाने ३६व्या किशोर- किशोरी गट राज्य अजिंक्यपद निवड चाचणी कबड्डी स्पर्धेचे आयोजन करण्यात आले आहे.
पुण्यातील बोपखेले, खडकी, डीगी गांव, मिलिट्री कॅम्प जवळ ५ ते ९ नोव्हेंबर या कालावधीत या स्पर्धा रंगणार आहे. या स्पर्धेतून महाराष्ट्राचे किशोर व किशोरी गटाचे संघ निवडण्यात येणार आहेत. हे दोन्ही संघ हरियाणा येथे २८ नोव्हेंबरपासून होणाऱ्या ३५व्या किशोर गट राष्ट्रीय कबड्डी स्पर्धेत महाराष्ट्राचे प्रतिनिधित्व करतील.
या वर्षापासून भारतीय कबड्डी महासंघाने फक्त मुलांच्या वजनात वाढ केली आहे. मुलांचे वजन ५५ किलो ऐवजी ६० किलो करण्यात आले आहे. मुलींचे वजन मात्र ५५ किलोचे ठेवण्यात आले आहे. याची दाखल घेऊन सर्व संलग्न जिल्हा संघटनानी आपल्या खेळाडूंची नोंदणी करून आपले ऑनलाईन प्रवेश अर्ज त्वरित भरावेत. असे आवाहन एका परीपत्रकाद्वारे राज्य कबड्डी संघटनेने केले आहे.
