बजाजनगरच्या कामगारांच्या मुलांची शानदार कामगिरी, आठ पदकांची कमाई
छत्रपती संभाजीनगर ः क्रीडा व युवक सेवा संचालनालय पुणे आणि जिल्हा क्रीडा अधिकारी कार्यालय पुणे यांनी आयोजित केलेल्या शालेय राज्यस्तरीय ज्यूदो स्पर्धेत छत्रपती संभाजीनगर जिल्हा ज्यूदो संघटनेच्या एमआयडीसी वाळूज येथील बजाजनगर व्यायाम व क्रीडा प्रसारक मंडळाच्या श्रीमती परमेश्वरी देवानी ज्यूदो प्रशिक्षण केंद्रातील खेळाडूंनी ज्यूदो खेळाचे शानदार प्रदर्शन करत १ सुवर्णपदक, २ रौप्य पदक व ५ कांस्यपदक असे एकूण ८ पदके जिंकली. सुवर्णपदक विजेत्या संस्कार मुसळे याची शालेय राष्ट्रीय ज्यूदो स्पर्धेसाठी महाराष्ट्र राज्य संघात निवड झाली आहे.
एमआयडीसी वाळूज येथील कामगार वस्तीत राहणाऱ्या कामगारांच्या मुलांनी कठीण परिस्थितीत मेहनत करून ८ पदकांची शालेय राज्य ज्यूदो स्पर्धेत कामगिरी केल्याबद्दल सर्वत्र त्यांचे कौतुक करण्यात येत आहे. बजाजनगर क्रीडा मंडळाच्या वतीने विजयी खेळाडूंचा सत्कार करण्यात आला. या खेळाडूंना मुख्य प्रशिक्षक भीमराज रहाणे, अशोक जंगमे, सुधीर काटकर, सुप्रिया जंगमे, ऋतुजा सौदागर यांचे मार्गदर्शन लाभत आहे.
विजेत्या खेळाडूंचे राज्य संघटनेचे सचिव दत्ता आफळे, जिल्हा क्रीडा अधिकारी बाजीराव देसाई, रामकिशन मायंदे, जिल्हा संघटनेचे अध्यक्ष अजित मुळे, सचिव अतुल बामणोदकर, विश्वजीत भावे, विश्वास जोशी, डॉ गणेश शेटकर, प्रसन्न पटवर्धन, भीमाशंकर नावंदे, दिप्ती शेवतेकर, झिया अन्सारी, विजय साठे,अमित साकला, सुनील सिरस्वाल, मनिंदर बिलवाल, दत्तू पवार, कुणाल गायकवाड आणि बजाजनगर क्रीडा मंडळाचे नंदमूरी श्रीनिवास, मनोहर देवानी, भीमराज रहाणे, अशोक जंगमे, अनिल पवार, नामदेव दौड, अभिजीत दळवी, सुधीर काटकर, सागर घुगे , हर्षल महाजन, उषा अंभोरे, ऋतुजा सौदागर, सायली राऊत, सुप्रिया जंगमे, यांनी अभिनंदन केले व पुढील स्पर्धेसाठी शुभेच्छा दिल्या.
पदक विजेते खेळाडू
सुवर्ण पदक – संस्कार मुसळे (सिद्धिविनायक ज्युनियर कॉलेज).
रौप्य पदक – सांची सोनवणे (एमजीएम संस्कार विद्यालय), ज्ञानेश्वरी जाधव (भीमाशंकर पाडळकर कनिष्ठ महाविद्यालय).
कांस्य पदक – त्रिवेणी काळे (एमजीएम संस्कार विद्यालय), अरोही जाधव (ज्ञानभवन इंग्लिश स्कूल), रिया पाटील (भीमाशंकर पाडळकर कनिष्ठ महाविद्यालय), धनश्री चिकणे (ऑर्चिड टेक्नो स्कूल), अनुज माडये (महाराष्ट्र पब्लिक स्कूल).
