सोलापूर : रुद्रपुर, उत्तराखंड येथे होणाऱ्या १९व्या कॅडेट राष्ट्रीय तलवारबाजी स्पर्धेसाठी येथील बी. एफ. दमाणी हायस्कूलच्या प्रथमेश अमित कस्तुरे व आदित्य नितीन निकते या दोघांची निवड झाली आहे.
दादर, मुंबई येथे झालेल्या १९व्या कॅडेट राज्य तलवारबाजी स्पर्धेत इप्पी वैयक्तिक प्रकारात प्रथमेश कस्तुरे याने रौप्य पदक आणि आदित्य निकते याने कांस्य पदक प्राप्त केले. या कामगिरीवर त्यांची ८ ते ११ जानेवारी दरम्यान होणाऱ्या राष्ट्रीय स्पर्धेसाठी निवड करण्यात आली. हे दोन्ही खेळाडू ऑल स्टार फेन्सिंग क्लबचे असून त्यांना पवन भोसले, वेदांत पवार व सोहम साठे यांचे मार्गदर्शन लाभले आहे.
या यशस्वी खेळाडूंचा तलवारबाजी संघटनेचे जिल्हाध्यक्ष प्रा प्रकाश काटुळे व संघटना सदस्य राजेंद्र गोटे यांनी सत्कार केला. या यशस्वी खेळाडूंचे जिल्हा सचिव प्रा दीपक शिंदे, सदस्य जितेंद्र पवार व अनिल पाटील यांनी अभिनंदन केले आहे.
