केआरएस स्पोर्ट्स अकादमीच्या खेळाडूंची लक्षवेधक कामगिरी
छत्रपती संभाजीनगर : सुरत येथे झालेल्या राष्ट्रीय एक्रोबॅटिक्स जिम्नॅस्टिक्स स्पर्धेत महाराष्ट्राचे प्रतिनिधित्व करताना छत्रपती संभाजीनगर येथील केआरएस स्पोर्ट्स अकादमीच्या खेळाडूंनी शानदार कामगिरी नोंदवत एकूण १९ पदके जिंकली आहेत. त्यात शुभम सरकटे व रिद्धी जैस्वाल यांनी डबल धमाका करत सुवर्णपदक पटकावले.
या स्पर्धेत महारास्ट्राचे प्रतिनिधित्व करत छत्रपती संभाजीनगरच्या केआरएस स्पोर्ट्स अकादमी येथे नियमित सराव करत असलेल्या ११ खेळाडूंची महाराष्ट्राच्या एक्रोबॅटिक्स जिम्नॅस्टिक्स संघात निवड झाली होती. यात छत्रपती संभाजीनगरच्या खेळाडूंनी १३ सुवर्ण, ४ रौप्य व २ कांस्य अशी एकूण १९ पदके पटकावली आहेत.
कनिष्ठ गटात वुमन्स ग्रुपमध्ये प्रांजल जोनवाल, सलोनी म्हस्के, प्रिया आगिवाले यांनी ९ सुवर्ण पदकांची कमाई केली. मेन्स पेअरमध्ये वेदांत पाटील, पार्थ रामशेटवाड यांनी ४ रौप्य व २ कांस्य पदक अशी सहा पदके जिंकली.
वरिष्ठ गटामध्ये मिक्स पेअर शुभम सरकटे, रिद्धी जैस्वाल यांनी ४ सुवर्ण व २ रौप्य अशी सहा पदके पटकावली आहेत. खेळाडूंच्या या धमाकेदार कामगिरीच्या बळावर महाराष्ट्र संघाने सांघिक वरिष्ठ व कनिष्ठ गटात सांघिक विजेतेपद पटकावले.
या सर्व पदक विजेत्या खेळाडूंना आंतरराष्ट्रीय पंच आणि प्रशिक्षक प्रवीण रावण शिंदे यांचे मार्गदर्शन लाभले आहे. या राष्ट्रीय स्पर्धेत महाराष्ट्र राज्याकडून प्रवीण शिंदे यांनी मुख्य पंच म्हणून भूमिका बजावली.
पदक विजेत्या खेळाडू व प्रशिक्षक यांचे महाराष्ट्र जिम्नॅस्टिक्स संघटनेचे अध्यक्ष संजय शेटे, उपाध्यक्ष डॉ आदित्य जोशी, सचिव डॉ मकरंद जोशी, डॉ सागर कुलकर्णी, छत्रपती संभाजीनगर जिल्हा जिम्नॅस्टिक्स संघटनेचे अध्यक्ष अॅड संकर्षण जोशी, उपाध्यक्ष डॉ रणजीत पवार, सचिव हर्षल मोगरे, डॉ विशाल देशपांडे आणि केआरएस स्पोर्ट्स अकादमी अँड जिम्नॅटिक्स केंद्राचे अध्यक्ष रावण शिंदे, उपाध्यक्ष शिवछत्रपती पुरस्कार प्राप्त अरविंद शिंदे, कोषाध्यक्ष शिवछत्रपती पुरस्कार प्राप्त ज्योती शिंदे (मोरे) तसेच सर्व पदाधिकाऱ्यांनी अभिनंदन केले आहे.
