हरियाणा, मणिपूर, त्रिपुरा, अरुणाचल प्रदेश खेळाडूंनी पहिला दिवस गाजवला
पुणे : पुनीत बालन गृप आणि इंस्पायर इन्स्टिट्यूट ऑफ स्पोर्ट्स यांचा सहकार्याने शिव छत्रपती क्रीडा संकुल बालेवाडी पुणे येथे आयोजित राष्ट्रीय सब ज्युनिअर ज्युदो स्पर्धेमध्ये सोमवारी महाराष्ट्राने तीन कांस्यपदकांची कमाई झाली आणि वैशिष्ट्य म्हणजे ही तीनही कांस्यपदके यवतमाळ जिल्ह्याच्या खेळाडूंनी पटकावली.
राष्ट्रीय ज्युदो स्पर्धा बाल क्रीडापटूंच्या नैपुण्याने गाजत आहे. ३० किलो गटातील वेदांत पारधी, २८ किलोमधील पौर्णिमा सातपुते आणि ३६ किलो खालील गटात राजवी तळोकार या तीन खेळाडूंनी महाराष्ट्राचे नाव पदक तालिकेत कोरले.
३० किलोच्या गटातील वेदांतने एकूण पाच सामने खेळले. परंतु हरियाणाच्या खेळाडू बरोबर ताकदीच्या अभावामुळे त्याला हार पत्करावी लागली. रिप-चार्ज राऊंडमध्ये मणिपूरच्या अनुभवी खेळाडूला पराजित करून कांस्यपदकावर वेदांत याने आपला अधिकार कायम केला. २८ किलो खालील गटात खेळणाऱ्या पौर्णिमाने पश्चिम बंगालच्या खेळाडूला आक्रमकतेने डाव मारण्याचा प्रयत्न केला पण गणित चुकल्याने ती नेवाजा या प्रकारात अडकली आणि तिला हार पत्करावी लागली. परंतु नंतर तिने उसळी मारून उत्तर प्रदेशच्या खेळाडूला पराजित करून कांस्यपदक मिळवले.
वेदांत आणि पौर्णिमा हे यवतमाळला रवी भूषण कदम यांच्याकडे सराव करतात तर ३६ किलो खालील गटात खेळणारी राजवी हिला जय खोडके यांचे मार्गदर्शन लाभले आहे. राजवीने मिझोराम, दिल्ली आणि हिमाचल प्रदेश या राज्यातील खेळाडूंना हरवत सुवर्णाकडे मार्गक्रमण करत असतानाच हरियाणा बरोबर तिचा अश्वमेध थांबला गेला आणि त्यामुळे तिला कांस्यपदकावर समाधान मानावे लागले.
स्पर्धेचा निकाल
सब ज्युनियर मुली : २८ किलोखालील : १. श्रेया पाल (पश्चिम बंगाल), २. सरंगना (केरळ), ३. निधी (दिल्ली) व पौर्णिमा सातपुते (महाराष्ट्र).
३२ किलोखालील : १. प्रियांका दास (त्रिपुरा), २. भूमिका तंवर (हरियाणा), ३. अफिया (केरळ) व सेजल ठाकूर (गुजरात).
३६ किलो खालील : १. हेतल (हरियाणा), २. ममता (छत्तीसगड), ३. राजवी तळोकार (महाराष्ट्र) व संजना (हिमाचल प्रदेश).
४० किलोखालील : १. रोशनी (मणिपूर), २. सुषमा (हरियाणा), ३. जीविका (दिल्ली) व नंदिनी (पश्चिम बंगाल).
४४ किलोखालील : १. कोको माई (अरुणाचल प्रदेश), २. दिशा (हरियाणा), ३. दृष्टी (राजस्थान) व कनाबला (मणिपूर).
सबज्युनियर मुले विभाग
३० किलोखालील : १. अधी (हरियाणा), २. बोथिस्वरन (तामिळनाडू), ३. सुजय (पश्चिम बंगाल) व वेदांत पारधी (महाराष्ट्र).
३५ किलो खालील : १. जितेन अंकुश (हरियाणा), २. विवेक (मणिपूर), ३. अमनदीप (पंजाब) व मनमित सिंग (उत्तर प्रदेश).
४० किलो खालील : १. शुभ शर्मा (उत्तर प्रदेश), २. नसीब बोरा (छत्तीसगड), ३. अभिजीत (मणिपूर) व इशू (पंजाब).
४५ किलो खालील : १. गर्व टोकस (दिल्ली), २. जयानंद (मणिपूर), ३. लोकेंद्र गुजर (मध्य प्रदेश) व वंगरंग वांगसु (अरुणाचल प्रदेश).
५० किलो खालील : १. सुरजीत (मणिपूर), २. जतिन (पंजाब), ३. दिवाकर रावत (उत्तराखंड) व तागरु तालुक (अरुणाचल प्रदेश).
