राष्ट्रीय क्रीडा स्पर्धा : केरळ, पश्चिम बंगाल संघांवर विजय
हल्दवानी : हल्दवणी, उत्तराखंड येथे सुरू असलेल्या ३८ व्या राष्ट्रीय क्रीडा स्पर्धेत महाराष्ट्राच्या पुरूष खो-खो संघाने केरळाचा तर महिला खो-खो संघाने पश्चिम बंगालचा पराभव करित गटात अव्वल कामगिरी केली.
गतविजेत्या महाराष्ट्राच्या महिला व पुरूष खो-खो संघांनी आपल्या लौकिकास साजेसा खेळ केला. पुरूषांच्या सामन्यात महाराष्ट्र संघाने केरळवर ११ गुणांनी (४७-३६) मात केली. मध्यंतराला महाराष्ट्राकडे १० गुणांची (२४-१४) आघाडी होती. विजयी झालेल्या महाराष्ट्रार्फे कर्णधार गजानन शेंगाळ (१.३० मि., २ मि. संरक्षण आणि २ गुण), राहुल मंडल (१.३० मि. संरक्षण व १० गुण), रामजी कश्यप (१.१० मि., १.४० मि. संरक्षण व ८ गुण), शुभम थोरात (१.४० मि., १.२५ मि. आणि २ गुण) यांनी विजयात मोलाची कामगिरी केली. पराभूत झालेल्या केरळ संघातर्फे निखिल बी (१.१० मि. संरक्षण व १० गुण), देवनारायण (१ मि. संरक्षण व गुण) यांनी चांगला खेळ केला.
महिला गटातील सामन्यात महाराष्ट्र संघाने पश्चिम बंगालचा एक डाव ४ गुणांनी (२४-२०) सहज पराभव केला. विजयी महाराष्ट्रातर्फे प्रियांका इंगळे (२.१५ मि., नाबाद १.५० मि. आणि ६ गुण), संपदा मोरे (१.३० मि. संरक्षण आणि ६ गुण), पायल पवार (१.४० मिनिटे संरक्षण), संध्या सुरवसे (२.५५ मि. व १.२५ मि. संरक्षण आणि २ गुण) यांनी दमदार खेळ केला. तर पश्चिम बंगालकडून इशिता विश्वास (१.२० मि. संरक्षण व ४ गुण), दीपिका चौधरी (१.१० मि. संरक्षण आणि ४ गुण) यांनी चांगली लढत दिली.
