लाईफलाइन-मासिआ औद्योगिक क्रिकेट ः विकास नगरकर सामनावीर
छत्रपती संभाजीनगर ः लाईफलाइन-मासिआ औद्योगिक टी २० लीग क्रिकेट स्पर्धेत ग्रामीण पोलिस संघाने फार्मा स्ट्रायकर्स संघाचा आठ विकेट राखून मोठा पराभव केला. या लढतीत विकास नगरकर याने सामनावीर किताब संपादन केला.
गरवारे क्रिकेट स्टेडियमवर ही स्पर्धा होत आहे. फार्मा स्ट्रायकर्स संघाने नाणेफेक जिंकून प्रथम फलंदाजी करण्याचा निर्णय घेतला. फार्मा संघाने २० षटकात नऊ बाद १३० धावसंख्या उभारली. या धावसंख्येचा पाठलाग करताना ग्रामीण पोलिस संघाने १३.४ षटकात दोन बाद १३१ धावा फटकावत आठ विकेट राखून सामना जिंकला.
या सामन्यात विकास नगरकर याने ३० चेंडूत ४० धावांची दमदार खेळी साकारली. विकासने सहा चौकार मारले. सूरज गोंड याने अवघ्या १४ चेंडूत ३५ धावांची धमाकेदार खेळी केली. सूरजने दोन षटकार व चार चौकार ठोकले. धीरज थोरात याने २२ चेंडूत दोन षटकार व तीन चौकारांसहक ३४ धावांचे योगदान दिले. गोलंदाजीत विशाल नरवडे याने ३१ धावांत दोन गडी बाद केले. विकास नगरकर याने ७ धावांत एक विकेट घेत अष्टपैलू कामगिरी नोंदवली. आशिष भारुका याने १६ धावांत एक बळी घेतला.
संक्षिप्त धावफलक ः फार्मा स्ट्रायकर्स ः २० षटकात नऊ बाद १३० (धीरज थोरात ३४, साई डहाळे २४, संजय बनकर १०, अमोल ढेंगळे नाबाद १९, विश्व शिनगारे १७, इतर १९, विशाल नरवडे २-३१, हिंदुराव देशमुख १-२३, सूरज गोंड १-२९, फिरोज पठाण १-१९, विकास नगरकर १-७) पराभूत विरुद्ध ग्रामीण पोलिस ः १३.४ षटकात दोन बाद १३१ (सूरज गोंड ३५, विकास नगरकर ४०, विशाल नरवडे नाबाद २६, हिंदुराव देशमुख नाबाद १३ , इतर १७, शिवाजी झिंजुर्डे १-२५, आशिष भारुका १-१६). सामनावीर : विकास नगरकर.
