क्रिकेट स्पर्धा ः नीरज जोशी, उबेद खाटीक, सिद्धेश देशमुख, राहुल निंभोरे चमकले
जळगाव ः जळगाव जिल्हा क्रिकेट संघटना व जैन स्पोर्ट्स अकॅडमी यांच्यातर्फे आयोजित करण्यात आलेल्या किरण दहाड स्मृती क्रिकेट स्पर्धेत जैन स्पोर्ट्स अकॅडमी संघाने विजेतेपद पटकावले.
या स्पर्धेत एकूण २० संघांनी सहभाग नोंदवला होता. ही स्पर्धा पोलीस कवायत मैदान व अनुभूती निवासी स्कूलच्या मैदानावर घेण्यात आली. या स्पर्धेचा अंतिम सामना झैन क्रिकेट क्लब आणि जैन स्पोर्ट्स अकॅडमी यांच्या ब्ल्यू संघादरम्यान खेळण्यात आला. अंतिम सामन्याची नाणेफेक जळगाव जिल्हा क्रिकेट संघटनेचे उपाध्यक्ष युसूफ मकरा यांच्या हस्ते करण्यात आली.
झैन क्रिकेट क्लबने नाणेफेक जिंकून प्रथम फलंदाजी करण्याचा निर्णय घेतला. परंतु कर्णधाराच्या या निर्णयाला त्यांच्या संघातील फलंदाजांनी आवश्यक तेवढा प्रतिसाद दिला नाही. त्यांचा संपूर्ण संघ १९ व्या षटकात केवळ ९७ धावात गारद झाला. जैन स्पोर्ट्स अकॅडमीतर्फे शतायु कुलकर्णी या डावखुरा फिरकीपटू गोलंदाजाने चार षटकात केवळ १७ धावा देत तीन महत्त्वपूर्ण बळी मिळविले. त्याला दुसरा डावखुरा गोलंदाज नीरज जोशी, उबेद खाटीक यांनी प्रत्येकी दोन बळी मिळवून चांगली साथ दिली. तर कर्णधार राहुल निंभोरे यांनी आपल्या लेग स्पिन गोलंदाजीवर सुद्धा दोन बळी मिळविले. झैन क्रिकेट क्लब तर्फे रोहित वंजारी याने थोडाफार प्रतिकार करत २४ चेंडूत ३२ धावा केल्या. मासूम खाटीक याने १९, शाहरुख शेख याने १३ तर अली हुझेफा याने १० धावा काढून आपल्या संघाला ९० पार नेले.
९८ धावांचे माफक लक्ष घेऊन उतरलेल्या जैन स्पोर्ट्स अकॅडमीच्या फलंदाजांनी दमदार फलंदाजी करत हा सामना केवळ आठ षटकात ९८ धावांचे लक्ष्य एका बळीच्या मोबदल्यात पूर्ण करून विजयी चषकावर आपले नाव कोरले. नीरज जोशी हा २९ धावा काढून बाद झाला. सिद्धेश देशमुख याने नाबाद ६१ धावांचे (१० चौकार व ३ षटकार) योगदान देऊन आपल्या संघाला विजेतेपद मिळवून दिले.
अंतिम सामना संपल्यानंतर स्पर्धेचे बक्षीस वितरण करण्यात आले. यासाठी प्रमुख पाहुणे म्हणून शनिपेठ पोलीस स्टेशनचे पोलीस निरीक्षक आर टी धारबडे तसेच पोलीस मुख्यालयाचे समाधान गायकवाड यांची उपस्थिती होती. दहाड परिवारातील अशोक दहाड, संजय दहाड व चंद्र दहाड हे उपस्थित होते. त्याचबरोबर जळगाव जिल्हा क्रिकेट असोसिएशनचे वरिष्ठ उपाध्यक्ष एस टी खैरनार, सहसचिव अविनाश लाठी व सचिव अरविंद देशपांडे तसेच झैन क्रिकेट क्लबचे संचालक सरोज शेख यांची उपस्थिती होती.
विजेत्या जैन स्पोर्ट्स अकॅडमी संघाला २५ हजार रुपये रोख व चषक देऊन गौरवण्यात आले. झैन क्रिकेट क्लबला १५ हजार रुपये रोख व चषक प्रदान करण्यात आला.
ही स्पर्धा यशस्वी करण्यासाठी पोलीस मुख्यालयाचे समाधान गायकवाड यांनी बहुमोल सहकार्य केले. तसेच जय स्पोर्ट्स अकॅडमी व जळगाव जिल्हा क्रिकेट असोसिएशन यांचे खेळाडू तसेच स्वयंसेवकांनी सर्व बाबतीत सहकार्य करून ही स्पर्धा यशस्वी केली. सर्व सहभागी संघ खेळाडू तसेच वैयक्तिक बक्षीस प्राप्त खेळाडू व उपविजयी व विजयी संघांना जळगाव जिल्हा क्रिकेट असोसिएशनचे अध्यक्ष अतुल जैन यांनी शुभेच्छा दिल्या आहेत.
स्पर्धेतील सर्वोत्कृष्ट खेळाडू
सामनावीर ः नीरज जोशी (२९ धावा व दोन बळी)
गोलंदाज ः उबेद खाटीक (नऊ विकेट)
फलंदाज ः सिद्धेश देशमुख (१३१ धावा)
मालिकावीर ः राहुल निंभोरे (३५ धावा आणि ८ विकेट)
