कोल्हापूर : महाराष्ट्र क्रिकेट संघटनेतर्फे आयोजित एमसीए सीनियर महिला एकदिवसीय करंडक क्रिकेट स्पर्धेत कोल्हापूर महिला संघाने बीड महिला संघावर ३५० धावांनी दणदणीत विजय मिळवला. कोल्हापूरच्या अदिती गायकवाड हिने २१६ धावांनी तुफानी द्विशतकी खेळी करत सामनावीर किताब पटकावला.
शासकीय तंत्रनिकेतन कॉलेज मैदानावर हा सामना झाला. कोल्हापूर महिला संघाने प्रथम फलंदाजी करत ५० षटकात सहा बाबद ४१३ असा धावांचा डोंगर उभारुन सामन्यावर वर्चस्व गाजवले. बीड महिला संघ २०.३ षटकात आठ बाद ६३ धावा काढू शकला. कोल्हापूर संघाने तब्बल ३५० धावांनी विजय नोंदवला.
या सामन्यात कोल्हापूरच्या अदिती गायकवाड हिने शानदार द्विशतक साजरे केले. तिने १४९ चेंडूत २१६ धावा फटकावल्या. द्विशतक झळकावताना अदितीने ३५ चौकार मारले. अनुजा पाटील हिने ५५ चेंडूत ७२ धावांची दमदार खेळी साकारली. अनुजा हिने दहा चौकार मारले. सुदीक्षा देसाई हिने पाच चौकारांसह २९ धावांचे योगदान दिले. गोलंदाजीत मधुरा इंगवले हिे १२ धावांत तीन गडी बाद केले. अदिती विघे हिने ५० धावांत दोन बळी घेतले. सुदीक्षा देसाई हिने एक बळी मिळवला.
संक्षिप्त धावफलक : कोल्हापूर महिला संघ : ५० षटकात सहा बाद ४१३ (अदिती गायकवाड नाबाद २१६, सुदीक्षा देसाई २९, शिवाली शिंदे २१, अनुजा पाटील ७२, परिणिता पाटील १२, अभिलाषा पाटील १४, इतर ४२, अदिती विघे २-५०, स्नेहा जगताप १-७०, कोमल वाघ १-३४, ज्ञानेश्वरी तांबे १-४०) विजयी विरुद्ध बीड महिला संघ : २०.३ षटकात आठ बाद ६३ (स्नेहा जगताप १६, ऋतुजा सुखसारे १६, ज्ञानेश्वरी तांबे १०, इतर १८, मधुरा इंगवले ३-१२, अभिलाषा पाटील १-२८, अक्षता नारतवडेकर १-७, सुदीक्षा देसाई १-०). सामनावीर : अदिती गायकवाड.
