नवी दिल्ली ः भारतीय संघाचा माजी कर्णधार आणि चेन्नई सुपर किंग्ज संघाचा माजी कर्णधार महेंद्रसिंग धोनी याने क्रीडा जगतातील अनेक लोक प्रभावित केले आहे आणि या यादीत जागतिक बुद्धिबळ विजेता डी गुकेश याचे नाव देखील समाविष्ट आहे. गुकेश बुद्धिबळाच्या पटलावर त्याच्या शांत वृत्तीसाठी ओळखला जातो आणि धोनी कॅप्टन कूल म्हणूनही प्रसिद्ध आहे. ४३ वर्षीय धोनी सध्या आयपीएल स्पर्धेत खेळत आहे. बुद्धिबळातील दबाव हाताळण्याचे श्रेय गुकेश याने धोनीला दिले आहे.
गुकेश धोनीचा खूप मोठा चाहता
गुकेश हा विश्वचषक विजेत्या कर्णधार धोनीचा मोठा चाहता आहे आणि आता तो सीएसकेच्या या दिग्गजाकडून जीवनाचे धडे शिकत आहे. चेन्नईतील एमए चिदंबरम स्टेडियमवर गुकेश यांनी सीएसकेशी विशेष संवाद साधला. यावेळी गुकेशने धोनीने त्याच्यावर आणि त्याच्या खेळावर कसा प्रभाव पाडला आहे हे सांगितले. गुकेश म्हणाले, धोनी हा असा खेळाडू आहे ज्याचे मी नेहमीच कौतुक करतो. ते कशावरही प्रतिक्रिया देत नाहीत. ते कोणत्याही परिस्थितीत शांतपणे विचार करू शकतात. सर्वात तणावपूर्ण क्षणांमध्ये, ते शांतपणे विचार करू शकतात. मी हे सर्व पाहत मोठा झालो. मला वाटले की मी माझ्या खेळातही हे अंगीकारले पाहिजे.
अशाप्रकारे, धोनीने मला खरोखर प्रेरणा दिली आहे, असे गुकेश म्हणाला. मी गोष्टींवर जास्त प्रतिक्रिया देत नाही. मी दबाव हाताळण्यास देखील सक्षम आहे. या बाबतीत, धोनीने माझ्या कारकिर्दीत मला खूप मदत केली आहे. केवळ प्रेरणा म्हणून नाही तर माझ्या खेळातही.
गेल्या वर्षी गुकेश याने डिंग लिरेन विरुद्धच्या वर्ल्ड चॅम्पियनशिप सामन्यात दबावाखाली शांतता दाखवली. पहिला गेम गमावल्यानंतर, गुकेशने शानदार पुनरागमन केले आणि लिरेनला शेवटच्या गेमपर्यंत संघर्ष करावा लागला. धोनीने मैदानावर दबाव कसा हाताळला आणि खेळाडूंवर नियंत्रण कसे ठेवले हे पाहिल्याने बुद्धिबळाकडे पाहण्याच्या त्याच्या दृष्टिकोनावर कसा परिणाम झाला हे गुकेश यांनी स्पष्ट केले.
गुकेश म्हणाला, जेव्हा जेव्हा दबावाचा क्षण येतो तेव्हा मला वाटतं की अशा परिस्थितीत धोनीने इतका दबाव कसा हाताळला असता. या गोष्टींमुळे मला शांत राहण्यास खूप मदत झाली आहे. मला वाटतं धोनीने एका मुलाखतीत म्हटलं होतं की, सोप्या गोष्टी करत राहा, जेव्हा परिस्थिती खूप कठीण होते तेव्हा मन स्वच्छ ठेवा. बुद्धिबळात कठीण परिस्थितींना तोंड देताना मी स्वतःमध्ये तीच शांतता आणण्याचा प्रयत्न करतो. धोनीला इतक्या वेळा पाहिल्यानंतर, त्याचा माझ्यावर खूप मोठा परिणाम झाला आहे.
२०११ च्या एकदिवसीय विश्वचषक स्पर्धेच्या अंतिम सामन्यात धोनीने विजयी षटकार मारताना पाहणे हा माहीच्या कारकिर्दीतील त्याचा आवडता क्षण असल्याचे चेन्नईच्या गुकेश याने सांगितले. “२०११ च्या एकदिवसीय विश्वचषक स्पर्धेच्या अंतिम सामन्यात मारलेला विजयी षटकार कोणत्याही भारतीयासाठी खूप महत्त्वाचा आहे आणि तो माझ्या मनात नेहमीच असतो,” असे गुकेश म्हणाला. या क्षणापेक्षा कोणीही मोठे असू शकत नाही.
